Ungma Senso Telongjem Kohima-i Hon Jubilee mong mongogo

Kohima, May 28 (TYO): May 25, 2019 nü RCEMPA, Jotsoma nung Ungma Senso Telongjem Kohima-i Hon Jubilee mongogo, iba sentong nung PWD Minister, Tongpang Ozukum-i Union indang official jubilee souvenir sayaja liasü.
Jubilee mong sentong nung jembidang MLA, Muthingnyuba Sangtam-i, lokti tentet ajak atema Hon Jubilee ya kanga tongtibang alizüng ka lir, aser lokti shiaji pei otsü kaka lir, ta metetdaktsü.
Paisa Ungma Senso Telongjem Kohima dang, tesüiba küm 50 nungi nenoki ajangzüktetbatem meyipa reprangshitsüla; nenok indang mangdang tasenji ner yimtsüng atema dang masü saka Naga nunger ajak atema asütsüla, ta ajungshi.
Iba sentong nung tongti o jembirji Akok Walling, Retd. Principal liasü aser President Kohima Ao Telongjem, Chiden Yaden, Alemtoshi Imsong, Tatar Chairman, Village Council Ungma aser Lipokmeren, IAS Retd. nungeria o tatsütsü jembia liasü.
Ungma Senso Telongjem Kohima tenüng nung Convenor Jubilee Planning Committee, T. Imo Longkumer-i tepela anküp o jembi.