Mkg SBI nung inyakertemi customer-tem den sensakasem

Mokokchung, May 28 (TYO): “Mega Customer Meet” ta sür State Bank of India (SBI), Regional Business Office, Mokokchung-i ayongzüka Longkumer Kilem nung customer-tem den sensaksemba sentong tajung ka liogo. Iba sentong ya tongtibangsa SBI customer nungi tebilemba balala bendena service tajungba agütsütsü nükjidong yur ayongba liasü.
Iba sentong nung SBI-i tawa tanü App lapokba digital banking “YONO” indang customer-tem nem metetdaktsüba den iba ajanga nüburtem nem tajangzük kechisa agütsür, item indangji lemsatepa liasü.
Iba sentong nung tongti o jembir, AGM, SBI RBO, Mokokchung, H. Hangsing-i jembidang, SBI ajanga digital service kechisa agütsür, itemji nüburtemi maongka agitsü asoshi ajungshia liasü. Tawa tanü adokba digital App teyari ajanga mapa aika tezüba aser pungbapungba akümtsü aser ibai yimyasübaa aotsü imlar, ta paisa shisem.
Nüburtem nem SBI ajanga service tajungtiba agütsütsü asoshi metokmeperi alibatem customer-temi ochi shia ashitsüla aser itemji metongshia mapa küma inyaktsü, ta paisa ashi.
Video conferencing ajanga SBI Chairman, Rajnish Kumar aser Managing Director, Arjit Basu-i mapang tatsütsü agia jembi. Area Manager, Jorhat & Mokokchung, SBI Life Team-ia SBI-i senotsü teyari agütsüba aser nungdakbatem aika lemsatepa liasü. Customer and Services Manager, Subrata Bhattacharjee-i YONO App indang rasaa ashi. Iba sentong nung SBI customer 70 shi arua shilem agia aden.
Olemtepba mapang customer-temi mulung masü ashiba rongnung tongtibangsa ATM nung sen peria maliba, link junga maliba, senotsü dak sentakba indang tali metettsü atema shisatokden nüngdakba, bank nung business inyakertem atema counter balaka nüngdakba, bank nung liso nisungtem shimoktsü mepishiba den evening branch lapoktsü atema tebilemba aser “dalal” nisungtem atsütoka intoktsü atema tebilemba balala lemsatep. Iba den ano SBI staff-tem dak customer den jembidang timi mejembiba jakla melenshitsü asoshi customer aikadi lemsatepa liasü.