Indian Army-i bendanger ta ajaba retired Captain yaritsü

Guwahati, May 31 (Agencies): Assam nung retired Captain Mohammed Sanaullah yaritsü ta Indian Army-i nangzükogo.
Assam nung Foreigners Tribunal kati Sanaullah ya bendanger ka ta züngok aser pa tang Goalpara nung aliba detention camp ka nung lir.
Arishi küm 52 tain Sanaullah ya Assam kübok Kamrup district nung Kolohikas nunger lir aser May 23 nü Boko Foreigners’ Tribunal-i pa ‘foreigner’ ka ta sangoktsü.
Pa ya Kalahi Kash nunger asür Mohammed Ali’er jabaso lir aser 1967 küm aso. 1987 küm Sonaullah-i Indian Army nung aden aser küm 30 tashi inyaker 2017 küm honorary Captain ka ama mapa nungi sodi agi.
Narengi area (51 Sub Area) nung aliba Army unit-i iba ken o süoki ia agir aser par kibong dang akokba tashi yaritsü ta nangzükogo.
“Army-i iba onük asoshi indangindanga meinyaktettsü kechiyong iba ya ozüng indang maparen ka lir. Ajisüaka, ozü ketdangsertemi retired ketdangser’er kibong den ajurutepogo aser pa India senso ta sayutsü atema yariteptsü nangzükogo” ta Defence PRO, Lt. Col. P. Khongsai-i ashi.
“Defence services nung inyakyim ka lir aser ibaji nisung ka züngsem asütsü maniokdang police verification asür. Maitsü mejangjai defence services nung kodanga nisung manioker. Onoki akokba tashi par kibong yaritsü merangdar” ta paisa metetdaktsü.
2017 küm Indian Army nungi sodi agiba sülen Sonaullah-i Assam Police indang Border Branch nung Assistant Sub Inspector (ASI) ka ama inyaktsü tenzük.
“2018 küm kü kinungbo National Register of Citizens (NRC) draft nung medensemba metet. Kodang pai iba atema ashishitep idangji Foreigners Tribunal nung pa anema ken o ka benoka lir ta osang metet. Pai punguben tashi Tribunal dangi ogo aser kulikakettem ajak agütsüogo” ta Sanaullah kinungtsü Sanima Begum-i ashi.
2014 küm Sonaullah nem President’s Certificate ka agüja liasü. Pai Kargil War dena Army nung mapa aika inyakogo.