PM Modi-i BIMSTEC züngsem linük lenirtem ajuru

New Delhi, May 31 (Agencies): Brihostibar aonung Narendra Modi-i tang agi tanabenbuba Ato kilonser inyaktsü atema tezüngzüktep agiba sülen Hokolbarnü pai Sri Lanka Tir, Maithripala Sirisena, Nepal Ato kilonser, K P Sharma Oli aser Bhutan Ato kilonser, Lotay Tshering nunger shia den jurila senden menogo; item senden nung linük tsüngda tesendaktep tajungba akümtsü atema jembiogo.
Modi-isa Bangladesh Tir, Abdul Hamid aser Mauritius Ato kilonser, Pravind Jugnauth na den-a senden amen.
Modi den Minister tem tenangzükba agiba sentong nung adentsü atema bendang linük balala nungi lenirtem New Delhi-i arua liasü.
Modi aser Sirisena na senden amendang tenapronglai, kiralongra ya meimchir atema amokmeren ka lir ta bangjem; tenatisa South Asia aser Indian Ocean region nung yimjung aser security alitsü atema amalitepa inyaktsü atema jembiogo, ta external affairs ministry-i sangdong ka nung metetdaktsü.
“Tenangzükba sentong nung adenba atema Modi-i Tir, Sirisena dang pelaba lemsatep. Paisa sorkari Sri Lanka den tesendaktep tajungba akümtsü atema inyaktsü ta shiogo,” ta MEA sangdong nung shia lir.
Modi aser Jugnauth na senden amendang lenir anapronglai linük ana külemi aintsü aser Indian Ocean region nung security alitsü atema inyaktsü bangjem.
Modi-i Nepal Ato kilonser, K P Sharma Oli den senden amendang tenapronglai linük ana tesendaktep tajungba akümtsü atema jembi.
Bhutan Ato kilonser, Tshering den senden amendang lenir anapronglai akhidang nungi tesendaktep junga aliba maneni wazüka ayutsü atema jembiogo, ta MEA-i metetdaktsü.
Bangladesh Tir, Abdul Hamid den senden amendang lenir anapronglai linük ana külem nükjidongtem ataloktsü atema tangatetba lemsatep.
Modi-i Kyrgyz Tir aser Shanghai Cooperation Organisation Chair, Sooronbay Jeenbekov-a ajurua senden menogo.
Sorkar tenangzükba sentong nung adentsü atema India-i Bay of Bengal Initiative for Multi-Sectoral Technical and Economic Cooperation (BIMSTEC) züngsem linüktem (India den Bangladesh, Myanmar, Sri Lanka, Thailand, Nepal aser Bhutan) nungi lenirtem den Jeenbekov aser Jugnauth nata jaoka liasü.