Tapir Gao’er kima nung gari ka rongdoktsü; Azü ka tepset

Itanagar, May 31 (Agencies): Arunachal Pradesh nung BJP sorkar kümteter anogo ana sülen mejangjatetba nisung kati Lok Sabha MP aser state BJP president Tapir Gao’er ki jakdang gari ka mi agi rongdoktsü aser azü ka tepset.
Hokolbar anepdang 6:30 ako meta mejangjatetba nisung kati Itanagar nung Lok Sabha MP’er ki jakdangi gari bener aru aser mi senoktsü. Item nisungtem jagisa iba tesem nung aliba azü ka tepset.
Iba tatalokba mapang Gao ya Delhi nung oa liasü aser pai police o chief secretary dangi osang sangoktsü.
Par kinungertemi iba tatalokba atema police tsüngdang FIR ka benokogo.
“Nisung kari ni aser ozü kibong tsübudaktsütsü atema meranger ama lir. Taoba mapang social media nunga ni anema mapa inyakogo. Iba ya politics ajanga ajungmesoba maparen ka lir. Nisung aika election nung tamakok nguogo. Anungji, ni MP aser party president asüba yong kari kü dak tenük yoka mapa inyaker asütsü akok” ta Gao-i ashi.
CCTV footage nung nisungji menüngoka lir aser ano iba tesem nung alirtemi pa maitsü jangjaogo, anungji kechiba police-i parnok aputsü atema mapang agir’ar ni mepelar, ta paisa shisem.
Külen, Arunachal Pradesh DGP SBK Singh-i ashiba agi “Nisungtem maitsü jangjaogo aser parnok aputsü atema police yokogo.”
“Onoki dangi ken o ka benokogo aser aibelenertem aputsü atema mapa inyakdar. Iba nisung apuba sülen ang pa political party kar nung züngsema ali-mali’ar jangjatsü” ta Singh-isa metetdaktsü.