ANCSU-i Technical Education Director anentsü akhanger

Kohima, May 31 (TYO): Technical Education nung Director mapa nungi anentsü mapang latettsüba süiba sülen tanü All Nagaland College Students’ Union (ANCSU)-i Directorate of Technical Education kima nung lungkak aitba sentong ka agi.
ANCSU-i “Onok nem telangzüba ka agüjang” ta banner ka yur ANCSU-i Director mapa nungi anentsü takhangba agüja lungkak ait. Iba sentong nung Kohima nung aliba college balala nungi kaketshir noklang aika aden.
“Technical education nung director Arjun Singh-i mapa nungi manen tashi mesüra scholarship tim mesüi amshiba ketdangser tenüngtem yimjak nung memetetdaktsü tashi onoki lungkak aittsü” ta tanü ANCSU president Katho P Awomi-i ashi.
“Aibelenertem merenshitsüla aser sorkari telangzüba tajung ka magütsüra, onoki tesashiba nung lungkak aittsü” ta Awomi-isa ashi.
Technical Education nung Director-i kaketshirtem asoshi meinyaktsü aser kümzüka mayu ta ANCSU-i tai tonglokja pa mapa nungi anentsü takhangba agütsü.
Department scholarship senotsü tim mesüi amshi aser iba atema director indang office-i telangzüba magütsü, ta ANCSU-isa ashi.
“Nü indang office-i ashiba agi, nai senotsü tim mesüi amshi aser na Technical Education nung maneni Director inyakra, Naga kaketshirtemi tetsükdaktsü ajurutsü ta onoki angajemer” ta ANCSU-i metetdaktsü.
Parnoki Director dang anogo pungu tsüngda mapa nungi anentsü aser iba amaji meinyakba ajanga tensa mejungi kümra, iba tebilemtsüji pai abentsü ta ANCSU-i mapang latetja liasü.