Triple talaq nokdangtsü atema ano bill benoktsü: Ravi Shankar Prasad

New Delhi, June 03 (Agencies): Triple talaq nokdangtsü atema sorkari Parliament nung bill benoktsü, ta tanü Law Minister, Ravi Shankar Prasad-i metetdaktsü.
Taoba ita 16buba Lok Sabha anenba sülen triple talaq bill thinen, kechiyong Rajya Sabha nung iba bill anüngdaka liasü.
Lok Sabha anenaka Rajya Sabha nung anüngdaka aliba bill tembo methinen. Ajisüaka Lok Sabha nung agizükba bill aser Rajya Sabha nung anendaka alibabo thinener.
Rajya Sabha nung BJP-i aniba NDA züngsem ajema aliba agi Rajya Sabha nung opposition-i iba bill anema nokdakba ajanga magizüktet.
Iba bill ano benoktsü asü?, ta asüngdangba langzüdang Minister Prasad-i, “Au, triple talaq ya onok (BJP) manifesto shilem ka lir, anungji kechiba mebenoktsü,” ta metetdaktsü.
Uniform civil code (UCC) dak sendakba tasüngdangba ka langzüdang minister-i, iba onük nung sorkari yimtenren party balala nung lenirtem den jembitsü, ta metetdaktsü.
Yaküm August 31 nü law panel-i UCC dak sendakba nung report masü saka consultation paper ka dang agüja, “Tang tensa nung Uniform civil code ya nüngdak masü mesüra taginüba ka masü” ta metetdaktsü.
Law panel-isa kiyimba, balaba aser tetsür-tebur kiyimtsü atema arishi küm tatakzük nung ozüngtem melenshitsü atema benoka liasü.
Muslim Women (Protection of Rights on Marriage) Bill, koba ajanga instant triple talaq (talaq-e-biddat) benshir, iba ya ozüng alema lir. Ano Muslim Women (Protection of Rights on Marriage) Ordinance, 2019 kübok instant triple talaq ajanga balabaji ozüng alema asütsü aser aibelener kinüngbutem küm 3 tashi tepoukdak ayutsü.
Tamalen ozüng agizüktsü atema Bill ka September 2018 nung sangdong, aser December ita Lok Sabha nung agizük saka Rajya Sabha nung magizük.