Rongsenkettsüng timtem atema Minister-i inyaktsüla: Shiv Sena

Mumbai, June 03 (Agencies): Hombarnü BJP den loktepa aliba party tulutiba- Shiv Sena-i Union Finance Minister, Nirmala Sitharaman dang, tang linük nung rongsenkettsüng timtem atema lenmang bushitsüla, ta ashi.
Linük rongsenkettsüng jenjang mezülongi ainba aser mapa manguba tebilemtsü tuluba akümba data nung ajemdaker Shiv Sena-i iba o ya jembiogo.
Shiv Sena-isa, o jembiba kija agi mapa manguba tebilemtsü anema meraratettsü, kechiyong tesüiba küm 45 nung mapa manguaba tebilemtsü tang tulutiba lir, ta metetdaktsü.
Shiv Sena indang osangkaket ‘Saamana’ yimobilem ajanga, “Tang linük rongsenkettsüng jenjang tamajungba akümer ama reprangteter. Linük rongsenkettsüng timtem aliba atema Finance Minister-i lenmang bushitsüla. National Sample Survey Office (NSSO) data ajanga ashiba agi, 2017-18 küm mapa manguba tebilemtsü shilem 6.1 agi timba kümogo. Iba ya tesüiba küm 45 tsüngda timtiba lir. O jembiba kija agi linük nung mapa manguba tebilemtsü anema meraratettsü,” ta metetdaktsü.
May 31, 2019 nü National Sample Survey Office (NSSO) report ajanga, financial year 2018-19 January nungi March quarter nung GDP ainba shilem 5.8 tashi ajema aluogo, ta sangdongba sülen Shiv Sena-i iba o ya jembir.
2014 küm Lok Sabha election mapang nung Narendra Modi-i parnoki sorkar kümra küm shia mapa crore anana adokdaktsütsü, ta nangzükba dak sendakba nung Shiv Sena-i, “2015-16 küm mapa lakh 37 tazüng liasü, saka item mapa atema nisung lakh 1.48 dang aniok. Yamaji 2017-18 küm mapa tazüng lakh 23 liasü saka nisung lakh 9.21 dang shim,” ta metetdaktsü.
Shiv Sena-isa, banks aser railways na nung mapa nung aniokba-a ajema kümogo, ta metetdaktsü.
“Küm ishika tsüngda Micro, small & medium enterprises (MSME) jenjang tamajungba kümogo. Public sector undertakings (PSUs) aika shibangogo mesüra takoksa tulu nguogo. Taoba BJP sorkar kümsük nung yangluba airports aika mamshir. Aluyimba jenjang kanga aoksaogo. Tesüiba ita 5 nung Marathawada kija nunga aluyimer 315 soseta süogo. Item nisungtem nem mapa agütsütsüji sorkar khuret lir,” ta Shiv Sena-isa metetdaktsü.