Mizoram deputy Speaker-i süngdong akhoba video prokshir

Aizawl, June 3 (Agencies): Mizoram deputy speaker aser kümsük anaben tashi MLA Pu Lalrinawma-i pu ka amer lenmang nung laoa aliba süngdong ka akhodang tangokba video ka kanga prokshir.
Lalrinawma ya engineer azüngba nisung ka lir aser par constituency Tuikum-i aodang len tom nung süngdong ka lenmang nung laoba ajanga traffic timtemba ajuru.
Pai shinga mataidang lenmangji lapoktsü atema süngdong akhotsü tenzük. Iba indang video ya social media nung kanga prokshir aser nisungtemi pa nem tenüngsang agütsür.
Iba video ya mezüngbo Twitter nung lemsatep. “Pu amsangji Mizoram nung Dy. Speaker Lalrinawma lir. Pai yim lenmang lapoktsü atema yariteper. Iba ya photo-op ka masü. Onok yamai dang lir” ta Twitter nung lemsatepba nisungi ashi.
Iba video ya Mizoram nung amenoka aliba Facebook page aika nung lemsateper aser nisungtemi Lalrinawma nem tenüngsang agütsüba manener.
Lalrinawma ya December 2018 küm tetokteper shinga melii Mizoram assembly nung deputy speaker inyaktsü shima liasü.
Lalrinawma ya mechanical engineering nung degree holder ka lir aser 2013 nung pai mezüng atema takok ngua MLA aküm.