Centre sorkari Hindi oshi indang education policy melenshir

New Delhi, June 03 (Agencies): Human Resource Development Ministry-i Hindi mejembiba states school tem nung Hindi oshi compulsory süa agitsü atema benokba sülen state balalai longkak aitba nung ajemdaker Hombarnü sorkari draft education policy melenshiogo.
Tamil Nadu nung DMK densema tanga opposition party temi draft National Education Policy nung oshi asem formula agitsü atema benokba anema ola adoka liasü.
National Education Policy indang revised draft ajanga, “Kaketshirtem, shirnoki item oshi asem nungi oshi ka mesüra iba dak tali melenshinüra class 6 mesüra 7 nung melenshitsü akok,” ta metetdaktsü.
NEP indang mezüngbuba draft nungbo Hindi oshi mejembiba state tem nung Hindi oshi compulsory agitsü atema benoka liasü.
BJP den teloktep nung dena aliba PMK-ia, NEP draft nung Hindi oshi compulsory akümtsü atema benokba anema ola adoka liasü.
Tanü Human Resource Development Ministry nungi ketdangser kati, “Iba ya policy ka masü saka draft report dang liasü. Onoki stakeholders balala den asüngdangtepa jembiogo. Committee-i tamalen renemba draft reprangshia kar melenshiogo,” ta metetdaktsü.