Kibong kati aniba telok !

India yimten nüchiso ngur küm 70 dak tali süia arudang, India ya mezüng ato kilonser (prime minister) Jawaharlal Nehru-er kinungertemi dang yimsüsüa arur amai aruogo. Iba jagi parnok den madener tangar teloktemi linük nung yimsü asütsüba ya akhi mapang chubatemi yimsü asüba amato senmang küma yimsü masütsüla ta teti aija jembir. Aji shitak lir, kechiyong Jawaharlal Nehru sülen par jala Indira Gandhi aser la sülen lar jabaso Rajiv Gandhi aser tang Rajiv Gandhi kinungtsü Sonia aser par jabaso Rahul aser jala Priyanka Gandhi nungertem tashi aluagi government kümteta yimsüsüba menden magitetaka, Indian National Congress nung tir aser tongti zülur menden agiba ajakji senmang amangyonga aru amai akümer. Atangji, ibaji parnoki tashiyim agi tangar atsüngdoker amener masü saka Congress telok nung züngsemtemi parnokji shimer. Küm ishika jakdang, Rajiv Gandhi sür külen Congress tashimait ooya alidang Congress nung taintemi kangshia Sonia Gandhi tir kümdaktsü aser la lenisüba kübok Congress telok kijai government akümtsüsa tatar menden magitetaka Dr.Manmohan Singh ato kilonser sür Congress teloki aniba government-i mapang talangka yimsüsüa aruogo. Asshi, tanü Congress jenjang ya tang dang nungi tamajungba lila ta bilemer. Atangji, lai dang kümnü nungbo Manmohan Singh masü saka Sonia Gandhi ato kilonser kümtettsüba liasü saka Congress telok rongnungia dena, la shitakbabo Italytsür asünungji, bendangtsür nembo ato kilonser mapa mebendaktsütsüla ta ronga atuba agi lai lasasa süngjemshir, Manmohan Singh nem maongka agütsü. Ajisüaka, Congress tirbo laisa aben aser tang jabaso Rahul Gandhi nem melenoktsüogo. Ibaji dang masü saka tawa agiba election nung takok angutsü asoshi Rahul teyi Priyanka Gandhi-a Congress telok nung tongti zülur shimtet. Iba amaji India yimten nüchiso nguli nungi kibong kati dang yimsüsüa aruba agi tangar teloki kanga jembitsür. Ajisüaka, Indian National Congress asoshi tanga lenmang mali, kechiyong All India Congress Committee nung züngsemtemi Gandhi’er kinunger melen parnok rongnung ajaki temulung lemteta nisung kata meshimtetter. Iba ama tensa ka nung 2014 küm election nungi Congress teloki government mekümtettsüsa tamakok anguba dang masü saka tatar senden nung Opposition lenir asütsü asoshia menden peria mengutetbaji tamakok dang nungi tuluba lir. Iba ama yimten telok ka tamakokleni aluba mapang lenir melen nung ajungtsü asü (?) ta bilemdangtsübaji tongtibang lir. Iba tangatetba nung, taoba hopta nung asenoki “Indian National Congress telok ya Gandhi-i kinungertemi masü tangar kati ani nunga koma süla ?” ta asüba nung bilemdangogo. Atangji, tang tangbo Gandhi’er kinunger medeni Congress moutettsü. Ibaji RSS medeni BJP moutet amai asütsü. Ajisüaka, Congress asentenshitsü atema Gandhi’er kinungertemi khen bilemdangtsüla adoker. Ibayongji, Rahul Gandhi-i pai pasasa tir menden nungi anendi ta shidangogo. Atangji, yimten nung yimsüsütsüba ya Tsüngremi lemzüktsüba pei pei mapang lir, anungji tang ya Congress mapang masü, BJP mapang lir. Iba mapang nung ya BJP teloki India nung Congress telok ya kenyongi mali kümdaktsütsü meranger. Ibaji meteta Congress telok nung lenirtem ya Gandhi’er kinungertem dang masü saka tsürabur mapang nungi Congress nung aruba pur kar nem lenisüba khuret ya melenoktsütsüla. Indian National Congress telok ama, nübortem nem yimten nüchiso bener arutsüba telok nung ajungyonga kibong ka nungisa tongtibang menden ajak agiba jagi telok nungbo tashimait tuluka alutsü. Shitakba agibo Indian National Congress (INC) telok ya India nunger ajak meyong asütsüla, kechiyong iba telok yagiang British yimten talenba kübok India nunger kangshia aliba saladaktsü aser yimten nüchiso bener aru. British nunger yimten tewangshidang, par yimli nungbo anüa kodanga mair ta jembiba mapang ka, 1885 küm December 28 anogo nung Indian National Congress tenzük.Tesüngmangtsü kaji, Indian National Congress tenzükba ya India nunger sensoi masü saka British nunger Indian Civil Sevice nung ketdangser (retired) ka tenüng agi, Allan Octavian Hume lenisüba kübok tenzük. Item otsü aser tangatetba nung ajemdaker, Indian National Congress ya Gandhi’er indang masü saka India nunger ajak meyong ta nübortemi angatettsüsa Gandhi’er kinungertemi inyaktsüla.