Wokha nung tailoring & training centre ka semzük

Wokha, June 03 (TYO): Nagaland sorkari state nung plastic amshiba nokdangba maparen dak sendakba nung District Administration Wokha den Lotha Eloe Hoho nati senteper sewing machine tenet tenla agütsüba den sü agi yangkhu yanglutsü atema teyari agütsü, aser ibaji June 1 nü Lotha Eloe Hoho Ki nung Wokha Deputy Commissioner, Dr. Manazir Jeelani Samoon, IAS-i semzükja liasü, ta ketdangsertem osang ka ajanga metetdaktsü.
Tetsürtemi sen aazüktsü, iba denji külemi sorkari plastic nokdangba mapatong nungittsü nükjidong nung sü agi yangkhu yangluba centre ya lapok.
Iba sentong nung jembidang Deputy Commissioner-i, iba centre nung karbosa mapa ngua sen aazüktettsü atema District Administration aser Wokha Town Council-i iba centre lapoktsür, ta ashi.
Paisa, iba centre nung yangluba sü yangkhuji plastic bags melentsü atema tajungtiba asütsü, ta ashiba den külemi lokti tentet balala dang sü agi yangluba bags amshitsü atema nüburtem nem awareness agütsütsü ayongzük.
Merükmejuba, plastic bags nokdangba aser infrastructure tajungba akümba tsütsü Wokha jilai teinyaktsü aika lir, ta shia pai ajak dang, asenoki anogo shia pei ki junga merükteta ayuba ama asen temeket ajak merüka ayutsüla, ibaji ajanga jila tali tebor tajungba kümdaktsütsü, ta ayongzük.
Lotha Eloe Hoho Advisor, Orenponi Ezung-ia tetsürtem jenjang ajungkettsütsü atema District Administration aser Wokha Town Council nati teyari agütsüba atema pelaba metetdaktsü.
Sentong nungsa ADC & Administrator Wokha Town Council-i sorkari plastic bags nokdangba mapatong metetdaktsüba den külemi iba mapatong nung ajaki amalitepa yaritsü mepishia metetdaktsü.
Kasa sentong nung SDO (C), Wokha, Chonbenthung Ezung-ia jembia liasü.
District Administration aser Lotha Eloe Hoho nati mapa tajung inyakba reprangteta Wokha District Forest Officer-i bio degradable Nursery bag 5000 mangatsüogo.