CMO Nagaland-i Power Department dang tuyur

Kohima, June 3 (TYO): Nagaland State Power Department-i tesem aika nung billing system tim mesüi inyakba reprangshimtsü atema Chief Minister’s Office (CMO)-i tetuyuba ka agütsüogo.
Power Department-i state tesem balala nung aser talisa Kohima o Dimapur jilatem nung ‘billings & collections system’ kanga mejungi inyaker aser timtem agütsür ta public o consumers-i CMO nem osang sangoktsür ta Advisor to Chief Minister V Sakhrie-i Commissioner & Secretary of Power Department dangi shidi ka zülu.
Iba inyakyim nung tim masüba maparen aika alitsü akok ta Sakhrie-isa ashi.
Department-i maparen ajak tajungba kümdaktsütsü atema mapa inyakba atema pelar. Kasa mapang nung ‘billings & collections system’ reprangshitsü atema mepishir, ta CMO-i Power Department dang ashi.
Department-i iba tebilemtsü atema mapa inyaktsü aser iba osang Chief Minister dangi abentsü atema metetdaktsü.
June 1 nü züluba shidi ya social media nung kanga belenshir saka CMO aser Sakhrie den tongteptsü merangaka osang magiteter.