Longleng nung 7th Economic Census atema training agi

Dimapur, Aami/June 04, 2019 (TYO): 7th Economic Census dak sendakba nung Enumerators aser Supervisors tem atema District Level Training ka EBRC hall, Longleng nung June 4, 2019 nü kaogo.
Enumerators aser Supervisors tem den jembiba mapang DC Longleng, John Tsulise Sangtam-i ashiba agi, census data tai agütsüba ajanga Nagaland nung sorkar-i scheme aser project shidak meinyakteti kümogo. Paisa, economic Census ya kanga tongtibang inyakyim ka lir, kechiyong planning inyakyim atema statistical data ya kanga tongtibang aser census tai agütsüba ajanga state renloka aotsü nokdanger, ta ashi.
State renloka aotsü asoshi enumerators aser supervisors tem shilem ya kanga tongtibang ta shia, John-i enumerators aser supervisors tem dang osang shidak agitsü asoshi bendanga agüja inyaktsü mepeshi, ajiasünungdang sorkari nüburtem atema sentong balala jung junga yanglutettsü, ta ashi.
DC-isa, iba dak sendaka aliba department aser Common Services Centre (CSC) tem dang economic census shidak bendentettsü atema enumerators aser supervisors tem inyakyim kanga junga asadangtsü aser len anitsü mepeshi. Paisa, paper mamshi inyakba 7buba Economic Census ya shilem 99% shidak asütsü, ta ashi.
7buba ECI 2019 inyakyim LDA, DESO Office Longleng Bausha-i metetdaktsü aser Tehomeli Phom DM, CSC Longleng-i tepela o jembi. Iba sentong ya Amos Phom, IOS Longleng lenisüba kübok aka.
Technical session nung EC 2019 nükjidong aser teratet DESO office, Longleng LDA, Bausha-i rasaa ashi aser “Walk thru-App” inyakyim ya DM CSC Longleng Hau-e Phom-i achaayanga agi. Iba sentong ya sensaksem akaba sülen tembang, ta ketdangser sangdong ka ajanga metetdaktsü.