Mt. Japfu Range nung Forest View Point ka yanglu

Kohima, June 04 (TYO): Kohima Forest Division-i sponsor süa Kigwema Nature Conservation Trust (KNCT)-i Mt. Japfu range nung Forest View Point ka yangluogo, ta ketdangsertem osang ka ajanga metetdaktsü.
June 3, 2019 nü Kohima Forest Division ketdangsertem inspection aruba mapang nung parnoki iba view point semzükja liasü.
Iba View point ya talisa arem nung merok-mi nungi arem kümzüktsü atema lir, kechiyong iba tesem nungjagi Dzukou valley kanga junga angur.
Iba view point ya kanga tongtibang tesem ka nung yangluogo, kechiyong iba tesem ecotourism ajungkettsüsa trekking, alima nung talangtiba Rhododendron, Double storied Cave aser Kigwema Community Conservation Area lir.
Iba view point yanglutsü atema osettsüsetji nisungi dang base camp nungi ghonda asem tashi bener atuba sülen iba tesem nung yanglu. Süngdonglidong kangabo meraksatsüi iba view point yangluogo.
Iba dak sendakba nung DFO Kohima, Rongsenlemla Imchen-i, merok-mi nungi arem kümzüktsü, arem shiruru wazüka ayutsü aser süngdonglidong kümzüktsü atema department-i inyakba nung KNCT, Village council aser yimertemi amalitepa inyakba atema pelaba lemsatep.
Tesüiba küm ka tsüngda kasa tesem nung yimertemi Kohima Forest Division den senpeter Forest Watch Towers ana aser Forest View point ka yangluogo, ta ketdangsertemisa metetdaktsü.