Kohima nung Economic Census atema DLCC senden amen

Kohima, June 04 (TYO): 7buba Economic Census agitsü atema Mongolbarnü Kohima ADC indang office nung Kohima District Level Coordination Committee (DLCC) mezüngbuba senden menogo, ta ketdangsertem osang ka ajanga metetdaktsü.
Iba senden nung mendenbula ADC Kohima, Lithrongla Tongpi Rutsa-i, 7buba Economic Census agitsü aliba ya kanga tongtibang, kechiyong asalentong yanglua mapa inyaktsü atema iba census nüngdaker, ta metetdaktsü.
Census bendenba agency-i tesem balala nung inyakdang timtem ajangshira district administration tsütsü nungia yariteptsü, ta lai metetdaktsü.
Lai tim departments, Supervisor aser Enumerators ajak dang iba mapa takok ngua inyaktsü atema kanga nendaka inyakdaktsüner, ta mepishia metetdaktsü.
Linük tesem ajungalen agiba 7buba Economic Census 2019 indang o lemtepdang District Economic & Statistics Officer aser DLCC nung Member Secretary, Khrietsolie Whourie-i, iba maparen inyakdang DLCC-i meteta alitsü atema telatetba kar tongmelang agi metetdaktsü.
Paisa, DLCC-i district nung census ketdangsüa inyaktsüla, aser iba maparen takok ngua inyaktettsü atema tanga agencies aser Panchayat/ward level nung local government lenirtem nem angatetdaktsütsüla, ta ashi.
District Manager, CSC-SPV, Nganuo Kielienyü aser Accountant IT&C, Vizelhounuo-ia 7buba Economic Census 2019 indang tongmelang agi metetdaktsüba den külemi district nung iba maparen inyaktsü atema renema aliba jenjang metetdaktsü.
District Manager-isa tang tashi nung ayimjema aliba area metetdaktsü aser timtem ajangshiba tesemtem nungbo administration teyari nüngdaktsü, ta metetdaktsü.
Iba dak sendakba nung ADC-i administrative centres nung yariteptsü, ta shiogo.
Nganuo Kielienyü-isa, June 6, 2019 nungi tenzüka iba maparen ya ita asem tashi inyaktsü, tang tashi nung Supervisors 32 register süogo; parnok kübok Enumerators 117-i field work inyaktsü aser Supervisors-i peipei tesem nung verification agitsü, ta metetdaktsü.
May 31, 2019 nü AMK Building, Kohima nung Supervisors aser Enumerators atema Kohima district level workshop agiogo, ta senden nung metetdakja liasü.