Ochimashi anema rara

Tang All Nagaland College Students’ Union (ANCSU)-i Higher Technical Education department anema longkak aita nokdakba ya ochimashi anema kaketshirtemi adokba ola ka lir. Asen lima nung ajaki ochimashi inyaker, anungji aueri auer aputsü arendakba ama shingaia ochimashi anema raratsü memulunger. Tanü lima nung ochishirbo aya agi asütsü ta asenoki jembir. Ashiko, iba o nungji amanger aya agi mesünüba agi asenok ajaki ochimashi mapa inyaker südi. Yisu tendangba ama, mojingi asenoka yaseta alidang amtsükang sayutsü. Ajisüaka, kodang asenoki jungjunga bilemdanga reprangdangdir, asenoki ochimashi inyakba agi asenokbo tebok sünger anüngtsüa akok saka asenoki meteta aser memeteti nisung aika tebok mesüngteti timtemdaktsür. Tanü asüng nübortemi shimtetba government-i nübortem asoshi tajung inyakba sentongtem rongnung tajung kaji sensaker kibong nungi adokba kaketshirtem nem ita shia scholarship sen agütsüba ya lir. Atangji, asen lima nungbo  sensaker chirnurtem asoshi lemzüktsüba scholarship ya takar tulur chirtema tiyazü kuli agi sensaker kümer chia alitsüa akok. Iba jagi balaka asenoki kaketshirtem nem lemzüktsüba scholarship ya atema kangabo süoki ia mebilemer. Ajisüaka, shitakba sensaker chirnurtem aika iba scholarship sen agidang azünger. Nisung karbo admission agidangyongi scholarship ngur agütsütsü tebilemba nung sen apur admission agir. Iba scholarship sen agidang kaket alir aser küm nung süoshi kabo alitetter. Iba senji angati anguba sen aika dang nungi jenjang tuluba aser sentiba lir. Ibaji meteta government-ia kaketshirtem atema scholarship sen yabo menua melii tekaraba nung agütsütsü tim. Ajisüaka, asen lima nungbo sensaker chirnurtem meima scholarship karaa agütsütsü meranger masü saka menua magütsütsü meranger amai taoba mapangtem nung aiben kaketshirtemi parnok meyong scholarship kua ta ayimtenba ola angashiogo. Ochimashi sensa süaka sensaker kaketshirtem scholarship sen chitsüba yabo nisung taküm rema yutsüba den kasa asütsü. Asenok anisüngzüka alirtem aikati memetettsüa akok saka scholarship mapang shitak nung manguba ajanga kaketshirtem aika mazüng anentsüsa akümtsü. Atangji, tang Nagaland nung kaketshirtemi scholarship mapang shitak nung manguba atema ola adokba ya scholarship manguba timtem dang nungi tuluba, ibai alima telongi alutsüsa ochimashi inyakba mapa anema tongpang ayongzükba ka lir. Tongpang asünungji karbo akoksatsüa akok saka tongpang kokerbo ajak tajangzük angutsü. Iba ama ochimashi anema raraba tongpang nungbo kaketshirtem den tsüraburtema aser sapaitema adentsüla, kechiyong kaketshirtemji tangar masü asenok chirnurtem lir. Tang amaisa asen lima nung ochimashi mapatemang shitak ama inyakba sobaliba ya menokdangtetra, asüngbo tang dang nungi government teimba kümadoktsü. Odang ashir ashi, asenokbo kaketshirtem meyong shilembo magitsüli aser sensakertem meyongbo mechitsüli. Koba government lidir liaka, ochimashi anema rarartem masü saka ochimashirtem merenshitsü merangtsüla. Koba lima nung government-i ochimashi mapatem anema ola adokba nokdanger aser ochimashi anema nokdakertem tepuokdak ayur, iba lima nung memenui rongrong tulu adoka nübortem o nübortem na tsüngda rara adoktsü. Iba rara nung nübortemi yimten yimsüsürtem atsüngdoktsü aser iba lima nung tesama tulu alitsü. Tanü yimten tashi aginüdang mesüra takar kümnüdang, asenoki ochimashi anemertem anema nokdakbaji asenoksasa asenok tesamaleni anir asütsü. Ochibo ochishia alisa tajungba. Ochi agi ajangzükba dang pei senmang akümer saka tangabo ajak pei tenük agi ngua samar. Iba tangatetba nung asenoki meinyaktetaka, asen chirnurtem dangbo ochimashi mapatem anema tasüa majem nokdaktsü ajungshidi.