Naga Hoho-i BJP lennirtem nem tenüngsang agütsür

Dimapur, June 4 (TYO): India nung tawa Parliamentary Elections nung BJP-i takok tulu anguba atema lennirtem nem tenüngsang agütsür ta Naga Hoho-i metetdaktsü.
India nung tanaben Prime Minister inyaktsü atema Narendra Modi shimba asoshi kanga pelar aser tenüngsang agütsür. Nisung ajaki takok aginür saka chichia inyakertemi ang takokji angur, ta Naga Hoho-isa ashi.
Asür AB Vajpayee-i Indo-Naga yimten tebilemtsü koktettsü atema inyaktsü tenzükba sülen nungi BJP-i iba tebilemtsü atema inyaka arur aser parnoki dang koktettsü. Tesüiba küm 5 tsüngda Frame work Agreement nung ajemdaker tesentaktep tajungba aküm aser Naga nunger o India nunger ajangzüktsü atema amalitepa inyaktsü lemtet, ta Communication Cell, Naga Hoho-i sangdong ka nung ashi.
Yimjung maparen tajungba inyaka aotsü merangdang, Prime Minister Narendra Modi lenisüba kübok mapang magii Indo-Naga yimten tebilemtsü koktettsü atema onoki mepishir, ta parnokisa metetdaktsü.