Kaketshirtemi Dimapur mokdangtsü ayonger; DNSU & DCCI-i memelar

Dimapur, June 4 (TYO): All Nagaland College Students’ Union (ANCSU) nung züngsema aliba Dimapur nung aliba college 19 longjemer Bodbarnü Dimapur District mokdangtsü ayongzükogo.
ANCSU-i takhangba agütsüba atema telangzüba tajung mangu tashi June 5, 2019 anepdang 10:00 ako nungi mapang telatet makai mokdangtsü ta tanü Dimapur college 19-i metetdaktsü.
ANCSU-i takhangba onük 5 agütsüba posema Dimapur nung College 19 kaketshirtemi Dimapur District ajunga mokdangtsü ta ashi.
Iba mokdang kübok Educational Institution, Para military Forces, Emergency Services, Medical, Police Personels, Administration aser Press Media medendaktsür, ta parnokisa shisem.
Dimapur nung college 19 ji- Salt Christian College, Saku’s Mission College, City College of Arts & Commerce, Immaneul College, Public College Of Commerce, Eastern Christian College, Dimapur Government College, Mount Mary College, St. John College, Patkai Christian College, J.N. Aier College, Tetso College, Pranabananda Women’s College, S.d. Jain Girls College, Cornerstone College, Mgm College, Yehmi College, Unity College aser Salesian College.
DNSU: June 5, 2019 nü Dimapur nung College 19-i mokdang ayongbaji Dimapur Naga Students Union (DNSU)-i memetet anungji iba sentong nung meyariteptsü ta DNSU-i telemtetba agiba osang ka metetdaktsü.
June 4, 2019 nü DNSU Constituent Units den Presidential Senden ka amendang iba telemtetba agi.
DNSU-i shishilembar/sorkar office tem aser tanga public services agencies ajak lapoktsü metetdaktsü. Iba mapang mokdangba sentong nung shilem agir kaketshir, kija mesüra telok kari dang timtem agütsüra, iba tebilemtsüji parnoki abentsü, ta DNSU President Sedeville Angami aser Genreal Secretary B. Mhajan Tsopoe nati sangdong ka nung metetdaktsü.
DNSU-i ANCSU posema nungiter aser yariteptsü saka June 5 nü mokdang ayongba ya asüngdangya kecha mesüi aser mebilemdangi ayongba lir aser iba ajanga public-i timtem ajurutsü, ta ketdangpurtemisa ashi.
DCCI: Külen, Dimapur Chamber of Commerce and Industry (DCCI)-ia tanga sangdong ka nung kaketshirtem nungiter aser miimmechi anema inyakdang kaketshir lennirtem apuba atema sasar ta metetdaktsü.
Ajisüaka, kaketshir teloktemi shishilembar den masü sorkar den rarar sernung shishilembabaren mokdangtsü ayongba osang angashidang kanga aoksar. Talisa, kaketshir lennirtemji Kohima nung apu saka Dimapur nun gang bandh alitsü ayongba ya tangatetba meshitak lir. Anungji, Dimapur nung shishilembartemi mokdang ayongba kaketshirtem dang shisa kaa inyaktsü mepishir, ta DCCI-i metdetaktsü.
Dokantem lapokdang timtem kar dang ajurura, iba tebilemtsüki kaketshir lennirtemi abentsü. Jelia osang mesangoktsü ayongba bandh kodanga memelatsü. Anungji, DCCI-i shishilembar ajak dang dokantem lapoktsü tetuyuba agütsür aser iba tashi mangartem merenshitsü, ta DCCI-i ashi.
District Administration aser Dimapur police-i akhi ama shishilembatsüsa tensa azüoktsü metetdaktsür, ta parnokisa shisem.