NDPP Mkg Region Youth Org-i nübotoka mapa inyak

Mokokchung, Aami/June 05 (TYO): Alima tzü-mopung kümzüktsü atema küm shia June 5 nü World Environment Day amonger, yamaji Mokokchung jila nunga Nationalist Democratic Progressive Party Mokokchung Region Youth Organization-i iba anogomong nung tanü Imkongmeren Sports Complex nung nübotoka jana merükteta mapa inyakogo; iba maparen nung 24 Angetyongpang aser 27 Mokokchung Town Assembly constituency na nungia lanurtemi shilem agiogo, ta General Secretary NDPP Youth Organization Mokokchung Region Media & Communication, Imlinungba Longkumer-i sangdong ka nung metetdaktsü.
Lanurtemi Imkongmeren Sports Complex nung gallery den moapu nung janaona ajak merükteta liasü, kechiyong melungtet telok balala (NGOs) aser telok balalai sentong balala agitsü atema mapang shia iba complex merüktetaka iba tesem kanga janar liasü.
NDPP-i yimtenren tentet ka ama politics nung dang masü saka loktiliba khuret-a angateta inyaktsüla aser alima tzü-mopung kümzükba nunga shilem agitsüla ta angateter, ta sangdong nung shia lir.
NDPP Youth Organization Mokokchung Region-isa ajak dang anogo shia plastic amshiba agi asen lima, arem shiruru aser asen temang nung timtem agütsüba jenjang angateta plastic ajema amshiba ajanga temelenshi adokdaktsütsü ayongzüker.
NDPP Mkg Region Youth Organization-i Meyisanger Lemtur, Secretary Central Youth Organization NDPP aser NDPP Mokokchung Region office-i senotsü tenla tulu agütsüba atema pelaba lemsateper, ta parnokisa metetdaktsü.
NDPP Mokokchung Region Youth Organization office-isa iba mapatong nung melungsoa shilem agir lanur züngsem ajak dang pelar, ta metetdaktsü.
Youth Organization-isa nija, telok, enterprises, nübur aser stakeholders ajak dang asen putu nung alima raksatsüba tayongzükbatem anema longjemer raratsü ayongzüker, ta sangdong nung shia lir.