State sorkari ANCSU-i ashiba angar; Lumia lungkak aitba anener

Bodbarnü Dimapur nung ANCSU  nung züngsema aliba college balala nungi kaketshirtem Deluxe point nung  adenshiba mapang agiba noksa ka angur.  (Dimapur, June 5)

Dimapur, June 5 (TYO) : June 4, 2019 nü kaketshirtem dak tashiyim mapa inyakba atema Nagaland Chief Minister aser Higher & Technical Education Minister nati sasa bilemtsüba metetdaktsüogo. ANCSU lennirtem den tai maket kaketshirtem apuba atema tenatisa tatok meshiogo, ta tanü ANCSU-i metetdaktsü.
State sorkarisa ANCSU-i akhangba ama mapa inyaktsü nangzükogo. State technical scholarship senotsü tim mesüi amshiba atema sorkari süoki ia bilemer ta lemsatep aser bushisüngdangertem dang tekaratiba nung osang metetdaktsütsü atema ashitsü nangzük, ta ANCSU President Katho P Awomi aser General Secretary Vimeyiekho Vitso nati ashi.
Bushisüngdangertemi osang magütsü tashi Technical Education Director mapa meinyaktsüi atatsü atema sorkari molunga agizük aser Nagaland nung scholarship scheme ajak atema Nodal Cell ka lapoktsü nangzük, ta ANCSU ketdangpurtemisa metetdaktsü.
Kohima Science College indang kimung tebilemtsü angatetteptsü atema inyaktsü aser iba onük ya June 10, 2019 cabinet senden nung benoka lemsateptsü atema sorkarisa nangzük.
Maneni, Higher Education Department kübok Assistant Professor mapatem Nagaland Public Service Commission ajanga shimoktsü takhangba sorkari molunga agizükogo.
ANCSU-i akhangba onük ajak state sorkari agizükba agi mapang telatet makai lumia lungkak aitba anener. Nagaland Chief Minister-i kaketshirtem asoshi bilemtsüba atema pelar, ta ketdangpurtemi ashi.
Talisa Naga Students Federation, Nagaland Law Students’ Federation, All Sumi Students Union (SKK), Eastern Nagaland College Students’ Union, Nagaland Public Rights Awareness and Action Forum, Nagaland Voluntary Consumer’ Organization, Dimapur Sumi Students Union, Highway Area Sumi Students Union, Niu-Land Area Sumi Students Union, Tenyimi Students Union Dimapur aser ANCSU lennir tejen ajak dang pelaba metetdaktsür, ta ANCSU President Katho P Awomi aser General Secretary Vimeyiekho Vitso nati ashi.