Abu Metha’er kidang injang khaloktsüba sashia aitsür: NDPP

Dimapur, Aami/June 06 (TYO): June 05, 2019 aonung Sovima, Dimapur nung NDPP Secretary General, Abu Metha’er kidang atalokba dak sendakba nung Brihostibarnü NDPP President, Chingwang Konyak-i NDPP CEB rongdak senden ka ayongzüka züngsemtemi bangzüng kar renemogo, ta tanü NDPP Media & Communication Committee-i sangdong ka ajanga metetdaktsü.
Senden nung züngsemtemi June 5, 2019 aonung 10:30 ako meta NDPP Secretary General’er kidang nisung tamajungertemi tasümait mapa inyaka injang tenet khaloktsüba tatalokbaji President aser NDPP pur ajaki sashia aitsür, ta bangzüng.
Parnokisa tanaben meyipa arur 11:30 ako meta Abu Metha’er ki anasa injang 17 khadoka liasü, ta sangdong nung shia lir.
“Secretary General anema inyakba atema NDPP süngmanger, iba denji külemi asen lokti nung state nüburtemi yimjung yongyaba mapang ka nung kechi kuli ajanga nisung tamajungertemi iba mapa ya inyak, ta onoki süngmanger. Ayaterm nung nisung ka anema inyakbaji aitsütsü kanga tetemsü, iba dak alia Abu Metha pa kinüngtsü aser chirnurtem den lia nisung tamajungertemi par ki amak. Iba ama kiralongra mapaji kecha lokti nunga magizüktettsü, anungji NDPP-i state nung senso tajung ajak dang item ama tatalokba ya longjemer aitsütsü ayongzüker,” ta sangdong nung shia lir.
CEB-isa state sorkar aser bushisüngdangba agency tem dang aibelenertemji tekaraba nung bushiteta aputsü aser memenoi ochi obendang agütsütsü atema inyakang ta takhangba agütsütsü lemtetogo, ta kasa sangdong nung shia lir.
Iba tatalokba nung ajemdaker CEB-i state sorkar dang Abu Metha aser par kibong züngsemtem den par kidang security peria agütsütsü atema akhangtsü lemtetogo. Ozüng amer ketdangsertem aser bushisüngdangba agency temi tekaraba nung iba tatalokba tejangja bushiteta ozüng nung ajemdaker aibelenertem nem tim temerenshi agütsütsü CEB-i imlar, ta kasa sangdong ajanga metetdaktsü.