FNR-i Arogotem dang mepishir

Dimapur, June 06 (TYO): Forum for Naga Reconciliation (FNR) telok ajanga Naga nunger yimten nüchiso bushir telok balala lemsar liaka, parnok tsüngda metsükchitepi putepa alitsü asoshi tenangzükba ka “Covenant of Reconciliation” (CoR) parnok ajaki mulunga agiba sülen tang June 13, 2019 anogo nung küm 10 ajungtsü.
Iba anogomong nung Naga nunger ajak mulungjang nung ano maneni yimjung nung putepa alitsü asoshi asentenshia nangzükshiba tamaitsü June 13, 2019 anüngdang 12:00 ako shitak nung Arogo ajak nung tenlaki tsüngtsüng second 60 temdaktsüner, ta FNR teloki mepishia metetdaktsüogo.
Iba kasa tangatetba nung ano June 16, 2019 amongnü temoatsü sentep mapang nunga Arogo ajak nung mapang ka agitetter Naga nunger yimjung nung putepa alitsü asoshi Tsüngrem dang taochi meshia sarasademdaktsüner, ta FNR telokisa mepishia metetdaktsüogo.
Asenoki yimjung nung putepa linüba tamaitsü sayubaji alima tsüngdang asenok putepa linüba kuli ka asütsü aser iba jagi asenok tangatetba tajungba nung tashi itshia akümtsü, ta parnokisa metetdaktsü.
Küm ter jakdang Naga lima nung Naga nunger telok balala tsüngda anogo shia azü tokshia tsükchitepba agi tensa tetsübutsüka küma liasü. Ajisüaka Naga yimten nüchiso bushir telok balala nungi lenirtem adenshia parnok tsüngda putepa alitsü nangzüktepba agi, item azü tokshiba lendongji anena adok. Iba nung jagi tenzüker, tanü tashi linük tenzükertem telok balala nungi lenirtemi telemtetba tajung agia aruba nübortemi ngudagi aser iba amaji Naga nungertem maneni yimjung nung putepa alitsübaji nübortemi yongyar, ta FNR sangdong ajangasa metetdaktsüogo.