T. Senka Ao-i züluba Tejen Olulu kaket sayaogo

Mokokchung, June 6 (TYO): Ao oshi nung nüngtugu kaket zülur tsürabur T. Senka Ao-i züluba kaket ka tenüng agi “Olulu Tejen (Old Rumours)” June 6 nü Nagaland University Vice Chancellor, Prof. Pardeshi Lal-i yangi Hotel Whispering Winds Mokokchung nung meraketa sayatsüogo.
Olulu Tejen kaket ya yimdangjem (novel) kaket ka lir aser tang tashi nungbo Ao oshi nung novel kaket tulutibaji ibai asütsü. Iba kaket nung otsütemji tapu 20 küma lemsar tapak (page) 328 tashi nung zülua angutsü. Iba kaket nung Ao Senden Literature Board (ASLB), Fazl Ali College nung tesayur Dr. Lanurenla aser Tir Yimyim nung Senior Reporter Sashimeren parnokia osemlok balala züluja lir.
Iba kaket lapokba sentong nung Prof. Pardeshi Lal-i mapang tatsüka agia jembidang, tsürabur T. Senka Ao indang kaket ‘Olulu Tejen’ sayatsü asoshi pa nem maongka agütsüba den kaket züluri iba kaket zünga kaket 11 tashi takok ngua adoktetba atema tenüngsang agütsü.
Pei oshi nung temulung agüja kaket züluba asoshi paisa pelaba lemsatep. Iba kaket nung tongtibang luyim ajak kongshia züluba angashir, anungji, tsürabur Senka Ao ya tanü tensa den apet kaket zülur tajung ka lir ta iba jagi kuli sayur, ta ashi.
Ibai otsü ka dang masü saka tezüluri kin ka indang loktiliba jenjang aser süiren (history) aika zülusema lir ta angashi nung, iba kaket ya tang aser tarutsü atema tongtibang mapa ka asütsü, ta paisa shisem.
“Pen (kolem) dak tashi tulu lir, pen ajanga alima aser lokti nung temelenshi tulu adokdaktsür”, ta pai ashi. Aji oda, iba kaket adokba ajanga lokti nem tajangzük agütsütsü imlar, ta paisa shisem.
‘Olulu Tejen’ kaket ya B.A level nung text book ka amai amshitsü agizükogo. Arishi küm 74 tain T. Senka Ao ya Meküli nunger aser pa ya taoba mapang Ao Milen nung Editor mapa küm talangka inyakogo. June 6 ya pa tasoba anogo lir aser iba anogo nung iba kaket ya sayar.
Sentong nung kaket zülur T. Senka Aoia mapang tatsüka agia liasü. Ao Senden Literature Board (ASLB) mendenbuba Dr. L. Temjen Jamiri “Tetsü oshi tesayur ka meraket” onük nung ajemdaker jembi. FAC nung tesayur Dr. Lanurenlai “Tejen Olulu” kaket nung keta aliba indang tongmelang agi rateta ashi. Rev. Dr. Takatemjeni temoatsü meshia sarasadem.