Injang khaloktsüba tatalokba CPO-i aitsür

Dimapur, June 07 (TYO): June 5, 2019 aonung Sovima village nung nisung tamajungertemi Abu Metha’er kidang injang khaloktsüba osang angashia Chakhroma Public Organisation (CPO) aoksar; Nagaland nung lokti tentet ajaki yimjung aser tesünep bushiba mapang ka nung ozüng kübok alir sensotem anema iba ama mapa tamajung aser kiralongra inyakba ya ajaki aitsütsüla, ta CPO President, Vichütuolie Mere aser General Secretary, Zakievisie Kruse nati sangdong ka nung metetdaktsü.
CPO-i iba tatalokba sashia aitsür aser iba dak sendakba nung ken o kar danga lira aibelenertem dang yimjak nung metetdaktsütsü ayongzüker, ta sangdong nung shia lir.
Iba ya nisung tepsettsü atema merangba den kasa lir, ta CPO-i züngshir, anungji ozüng amer agencies-i item nisung puteta ozüng tsüngdangi anir arutsü mepishir, ta parnokisa metetdaktsü.