Injang ola anentsüla

Nagaland nung tashiyim amshiba, tiyazü jembiba, külakoktsüba aser ochimashi mapatem agi sünga liaka, tajung kaji, mapang talangka prangpong injang amshia nisung amokmerenba aser khasetba osangbo mangashii aruba mapang ka, tang Dimapur nung yimten yimsüsür ki ana tashi nung aonung nisung kari prangpong tesashi agi kishi nung aiben khaloktsür aoba osangji taoksatsüka aser shisabolutsüka lir. Iba jagi küm ter jakdang Nagaland nung telok o telok na yimdong nung arishitepa khatepba aser yimsüsür khasettsü merangba mapatem bilemtetdaktsür. Yakaonung NDPP Secretary General Wb.Abu Metha’er kima aser yasüng Brehostibar aonung MLA Wb. Sharingain :Longkumer’er kima nisung kari injang tesashi yoker aoba osangji parnok atema dang masü saka Nagaland nung alir ajak atema shisabolutsü osang tamajung ka lir. Atangji, tang tashi nung injang yokertemji shirnokar mejangjatetter, anungji kechi tejashi mesüra kechi nükjidong nung injang agi yamaji yimsüsürtem amokmerentsü tenzükar ashitsü makok, ajisüaka injang amshiba jagi alima tsüngdang ano khen Nagaland tensa mejungi sayu tenzükogo. Ano, kangasa tia majung kaji, tang Nagaland nung yimsüsürtem amokmerena injang amshiba ya FNR teloki Naga lima nung linük tenzükertem telok balala tsüngda metsükchitepi yimjung nung putepa alitsü nangzükteper küm ter ajungbamong June 13 nü amongtsü sangdongba mapang ka ataloker. Iba ama mapang ka nung yimten yimsüsürtem amokmerena injang amshirtemjibo Naga nunger linük tenzükertembo masütsü imlar aser parnok ka asünunga, iba ama nisung tsübudakja tashiyim amshiba aser nisung taküm samatsütsü amokmerenba mapatem nungi pilatsüla. Alima nung alir asünungji, yimten yimsüsüba maparen nung asütsüa akok mesüra rongsen bushiba lenmang nung asütsüa akok, nisungtem rongnung mepelatep aser tejashitep adoktsübaji lenmang aika lir. Ano, yimten nung balaka anogo shia mapa ka nung mesüra ka nungbo nisung karbo jashidaktsütsüsa adoker, kechiyong nisung ajak peladaktsütsübo makoker. Aji dang masü saka ano yimsüsürtemia pei ajung asaa mebilemdangi inyakdang, meteta aser memeteti nisung aika mulung yirutsür aser akoksadaktsür. Item jagi nisungtem rongnung meputep adokdaktsür aser tsükchitep tenzüker. Ajisüaka, shiba südir süang, kar dang jashiba agi mesüra takoksa marem nisung kar tsübudakja injang amshitsübaji mesüra nisung kar taküm samatsür külenang pei tebilemba ataloktsü merangbaji yiar mesüra tasümait mapa asütsü. Joko, Nagaland nungbo shingaia injang amshia tajangzük aser takok angutsü memerangtsüla. Injang amshia takok anguba agi ajungtsü asübo Nagaland ya alemli junger süla. Aji oda, injang amshia tajangzük anguba agi alima nung anisüngzüka alitsü asübo tanü Naga nunger kibonbg aika anisüngzüka lila. Injang agi ola madokdaktsüi nokdangba mesüra injang agi tsübudakja telemtetba agiba agi kodanga alima majungtsü. Injang amshirji injang agi asür ta jembiba ya shitaka ta asütsüsa asen lima nung aiben asenoki ataloka nguogo. Iba tangatetba nung pei taküm aser kibong asoshi dang masü saka Naga lima rangben ajungtsü bilema shingaia injang agi pei bilemba ataloktsü memerangtsüla. Langka tejashiba lira, injang agi masü saka ochi o jembia inyaktsüla. Tang amaji Naga lima nung injang amshi tenzükra, akhidang ama asen lima tetsübutsüka kümadoktsü. Asenok ajak atema kanga shisabolutsükaji, Naga nunger aika ket nung temelaba mali ser prangpong tesashi yua lir. Item prangpongji amshia pei tebilemba ataloktsü merang nungbo Naga lima agi matitsü. Naga lima ajungtsü atema prangpong masü ochi dang nüngdaker, anungji ajaki ochishia alitsü merangtsüla aser ajaki injang agi masü ochi o jembitsüla. Joko, asen lima ya injang ola agi tetsübutsüka mekümdaktsütsüsa lokti tentet ajaki injang amshiba mapa yabo kanga sashia aija nokdangtsüla.