Kohima District Task Force (DTF) orientation sentong agi

Dimapur, Aami/June 11 (TYO): Child Labour & Adolescent Act dak sendakba nung Kohima District Task Force (DTF) orientation programme ka DC Conference Hall nung June 11 nü Deputy Commissioner, Kohima, Anoop Khinchi IAS lenisüba kübok agiogo.
Sentong nung Deputy Commissioner-i ashiba agi, tang district nung dang masü saka state ajunga aser linük nung child labour ken o ya kanga bulua jembiba ken o ka lir. Pai iba dak sendaka alirtem dang parnok mapa aser khuret jangjaa alitsü aser Act kübok inyaksangshitsü ayongzük. DC-i ashiba agi, child labour dak sendakba nung temeden kar lir aser stakeholder temi ozüng dak ajemdaker employer tem anema jenjang tapet agitsüla.
Department of Labour, Project Officer, T. Chubayanger-i iba onük nung ajemdaker jembidang, district nung Child Labour indang metetdaktsü. Pai Child Labour (Prohibition and Regulation) Amendment Act, 2016 kübok principal Act section balala rasaa ashi, kong pai Section – 3 nung section tasen (prohibition of employment of children in any occupation and process) benoka aliba indang ashi. Paisa, tanur arishi küm 18 tashi Child and Adolescent Act küboki aitettsü ta ashi. Paisa, ‘lendong aketba mapa kong adolescents tem inyaktsü memelar aser tanurtem dang nungi teyari agitsü memelar’ aser ‘mapa kong tanurtem par kidang aser kibong mapa nung inyaktsü memelar,” iba indang rasaa ashi.
Nagaland dak sendakba nung Chubayanger-i ashiba agi, tanurtem timba ka kidang, hotel, restaurant aser workshop amala nung teyariteper ama anioker ta ashi. Paisa, ILO rectification benokogo aser tanur arishi küm 14 nungi teküboktem anioka mapa inyakdaktsütsü nungi nokdangtsü, ta ashi. Anungji pai stakeholder tem tinyaktsü, inyakyim aser Act kübok temerenshi balala aliba dak rangloker jembi.
Senden nungsa sentepa aliba nüburtemi tanur mezüng meshia amshiba, tanur tekümzükba aser anepalu nüngdakba ken o aser ozüng kübok parnok nem tekümzükba agütsütsüba dak sendakba nung sensak asem. Maneni senden nung Additional Deputy Commissioner, Kohima, Lithrongla Tongpi Rutsa-isa nüburtem nem tangazükba balala agütsütsü nüngdakba indang benoka jembi, ta ketdangser sangdong ka ajanga metetdaktsü.