AKM-i school aser anasa aliba dokan-tem meita jajar

Mokokchung, September 16 (TYO): Shisaluyimertem tim lenmang nung azüoka anitettsü mangdang yur Ao Kaketshir Mungdang-i awashia inyakba wadang kübok tongtibang shilem ka ama September 16 nü Mokokchung jila nung school aser anasa aliba dokan kar AKM-i semdanga jajaogo.
Iba mapang shisaluyimer aika tobacco aser iba dak sendakba tachitsütem bena alir aser achirtem puteta AKM-i temedongshitsü O shia merenshi aser tazüokba temzüng agüja liasü.
COPTA ozüng nung shia aliba ama kaket reju tamaket meter 100 telungtet nung moko aser iba dak sendakba tobacco tachitsü mayoktsü AKM-i sangdonga aliba dak ajemdaker shisaluyimer lenirtemisa ajishiyima oa Pan dokan kar nungi tenokdangba tachitsütem apu.
Aibelener dokan kiburtem jaoka AKM-i sayubentsü agütsü aser tanaben kasa aibelen masütsü tekümdangtsü ashi aser School mapang mesüra uniform nung alir shisaluyimer shinga danga item tachitem khenyongi mayoktsü angatettep. Tanaben aibelenba putetra AKM-i tatok magütsütsü aser dokan kiburtem anema temaba authority dangi keno bena ‘Trade permit” anentsütsü ta tekümdangtsü shia liasü.
Osangzülurtem den senden ka amendang AKM-isa kaket reju talisa Govt. school-tem nung inyaksangshi metokmeperi ongdang kar reprangtetba lemsatep.
Govt. school nung inyaker tesayur aser tongtibangsa 4th grade staff-tem aika ‘leave-a magütsüidang’ mapangi shitak maruba AKM-i reprangteta pei tata mapajibo shinga dena meyimlatepi inyaktsüla ta ashi.
Iba den külemi shisaluyimertem dang yimya tamajung sayua tesayurtema shinga temesepba chiyungtsütem chia-jemer School-i marutsüla ta AKM lenirtemisa tekümdangtsü shia liasü.
Tainlonglong aser tangar jilu reprangzüka benshinüba mapang asünung, shisaluyimer tsüraburtemia khuret süa pei tanur libaliro, yimyatsüya aser inyaksangshitem pudanga reprangtsüla aser sayubentsü agüja tim lenmang nung anitettsü merangteptsüla ta lenirtemisa lemsatep. AKM-i maneni school-tem ajungben semdanga oa aibelener shisaluyimertem anema temerenshi agütsütsü aser anasa aliba dokan-tema mapang shia ajishiyima mittsü.