Samar bushiba AN 32 tayimtsü Arunachal nung nguogo

Itanagar, June 11 (Agencies): June 3 nungi Indian Air Force (IAF) indang AN 32 tayimtsü ka samar bushia aruba sülen tanü Arunachal Pradesh kübok Siang district nung ngutetogo.
Mongulbarnü IAF-i Twitter ajanga MI 17 helicopter-i AN 32 tayimtsüji angu ta osang metetdaktsü.
“MI 17 helicopter ka ajanga AN 32 tayimtsüji Lipo nungi kilometer 16 shi pilar ngutetogo. Iba tayimtsü nung mena alirtem indang osang jangjatsü atema mapa inyakdar” ta IAF-i ashi.
Tang tashi nung IAF-i AN 32 tayimtsü nung mena alir nisung tenüngtem memetetdaktsüi lir.
June 3 anüngdang 12:27 ako meta AN 32 tayimtsüji Jorhat airbase nungi apuso saka nikongtsütsü 1:00 ako tashi nung tongtepratep kecha makai aküm. Iba tayimtsü nung IAF personnel 13 tashi mena liasü.
Tesüiba anogo ishika tsüngsang-mopung majungba ajanga anüng nungi tayimtsü bushiba maparen junga meinyakteti aru. Ajisüaka, alilenbo Indian Army personnel aser civil administration-i maneni inyak.
Army aser Indo-Tibetan Border Police (ITBP)-i night-time sensors amer aonunga mapa inyak.
Honibarnü IAF-i AN-32 transport aircraft tsükokba indang osang sangoktsür nem sen lakh 5 agütsütsü ta metetdakja liasü.
Iba tayimtsü bushiba maparen nung IAF indang C-130J transport aircraft, Sukhoi -30 fighter jets, Indian Navy indang P8-I search aircraft aser IAF o Army helicopter aika amshia liasü.
Maneni, AN 32 tayimtsü bushiba nung ISRO satellites aser unmanned drones dena amshiogo.