Mon District Hospital building lapokba sentong magizüker

Dimapur, June 11 (TYO): June 27, 2019 nü Chief Minister Neiphiu Rio-i District Hospital Building lapoktsüba sentong magizüker ta All Konyak Frontal Organisation-i metetdaktsü.
National Health Mission kübok iba mapa atema sen crore 21.26 lemzükjaka, ki kanga mejungi yangluogo, ta parnoki sangdong ka nung ashi.
Detail Project Report (DPR) nung agüja aliba ama mesüi mapa inyakogo aser Hospital Management Committee-i aiben mepishiaka, bangdakpurtemi tashi manga, ta parnokisa shisem.
Joint Konyak Frontal Organisation-i Nagaland Chief Minister nem memorandum ka agütsü aser iba indang copy ka Prime Minister’s Office dangia yok. Iba shidi nung onük ti shia lir aser onüktem rongnung nübo peria maliba, senotsü tim mesüi amshiba aser Diagnostic facilities & equipments peria malibatem shia lir, ta All Konyak Frontal Organisation-isa metetdaktsü.
Onoki benoka aliba onüktem agizüka mapa meinyakra, District Hospital lapokba sentong magidaktsütsü aser Konyak nungeri temeten angutsü atema Public Interest Litigation (PIL) ka benoktsüsa akümtsü, ta parnokisa ashi.