Cyclone Vayu agi Gujarat mekongshi

Ahmedabad, June 14 (Agencies): Hokolbarnü Gujarat Chief Minister, Vijay Rupani-i, yipru mopung tesashi ‘Vayu’ agi state mekongshi, kechiyong iba yipru anüolen tsütsüleni süia ogo, ta metetdaktsü.
Gandhinagar nung tongti ketdangsertem den senden ka amenba sülen Rupani-i ketdangsertem dang, pei kidang nungi aienshia atadaktsüba nisung lakh 2.75 ji pei kidangi meyipa odakjang ta tuyua liasü.
Osangbenertem den jembidang Chief Minister-i, “Lendong nungi Gujarat jenbuogo. Joko cyclone Vayu nungi amokmeren mali, kechiyong Arabian tzüyim nung iba yipru anüdoklen tsütsüleni süia ogo,” ta metetdaktsü.
Paisa, “Tzüyimkümlen alir nisung lakh 2.75 shi aienshidakja liasü, aser tangbo parnok pei kidangi meyipa aotsü akok,” ta metetdaktsü.
Taruba anogo asemnü nung state sorkari pei kidangi nungi aienshia atartem nem allowance sen crore 5.5 agütsütsü, ta pai sangdong.
Meteorological Centre osang ajanga ashiba agi, iba yipru ya tang tzüyimkümlen nungi pilaa odar aser tang Porbandar nungi kilometer 150 shi pilar Arabian tzüyim nung lir.
“Asüng nungi school aser colleges lapoktsü. Onokisa tzüyimkülen aliba districts nung mapa lemzükja aliba ketdangsertem aser minister tem meyipa arudaktsütsü. Tanü nungi item tesem nung Road transport bus senzü tenzükogo,” ta Rupani-i metetdaktsü.
Ajisüaka National Disaster Response Force (NDRF) teams bo taruba ghonda 48 tashi mapa lemzükba tesem nungsa alitsü, ta pai ashi.
Iba yipru ajanga tanü Gujarat kübok jila 114 nung tzünglu aruogo, aser tzünglu timba aruba tesemji Gir-Somnath district kübok Talala jila liasü, ta Met department-i sangdong ka ajanga metetdaktsü.