Assam nung armed forces training institute lapokdaktsünür

Guwahati, June 14 (Agencies): Assam chief minister Sarbananda Sonowal-i Hokolbarnü New Delhi nung Union defence minister Rajnath Singh dne ajurutep aser Assam nung Armed Forces indang National Level Training Institute ka lapoktsü tebilemba lemsatep.
Rajnath-i Armed Forces ketdangsüba ajanga Assam aser Northeast kanga ajangzüktsü, ta Sonowal-isa ashi.
Assam nung arrtsü anüktsü atema aser telungpurtem azüoktsü atema Armed forces mapa aika lemzükjaka, Armed Forces indang reju ka danga mali, ta paisa shisem.
Army-i yaria Assam nung telungpur khuret tulu ka azükogo aser tarutsü anogo tensa tajungba akümtsü ta Sonowal-isa Defence minister dang ashi.
State sorkari lanurtem nem linük meimdaktsütsü atema mapa inyaker aser iba nung anogo asemnü Independence Day amungba, national & international sports aser tanga sentongtem ayonga agir, ta paisa metetdaktsü.
Armed Forces indang National Level Training Institute yanglutsüba aliji state sorkari agütsütsü, ta Chief Minister-isa shisem.
Iba reju lapokba ajanga Assam aser Northeast nung lanurtemi armed forces nung adentsü jangratsü aser linük meimba aser ka akümba tangatetba agütsütsü, ta Sonowal-isa Rajnath dang ashi.