Kiralongra pusemba linüktemi telangzüba agütsütsüla: Modi

Bishkek (Kyrgyzstan), Aami/June 14, 2019 : Hokolbarnü Kyrgyzstan yimtiba, Bishkek nung India Ato kilonser, Narendra Modi, anogo ananü Shanghai Cooperation Organization (SCO) senden nung adenba noksa nung angur.

Bishkek/Kyrgyzstan, June 14 (Agencies): Pakistan linük aitsüba olen ka nung tanü India Ato kilonser, Narendra Modi-i, kiralongra pusemba aser yariba linüktemi telangzüba agütsütsüla, ta metetdaktsü.
Hokolbarnü Kyrgyzstan yimtiba, Bishkek nung Shanghai Cooperation Organisation (SCO) senden nung jembidang Ato kilonser, Modi-i kiralongra anema raraba nung SCO linüktemi amalitepa inyaktsü ayongzük.
India-i kiralongra maliba lokti ka aginer, ta shia Modi-i, “Taoba Amongnü ni Sri Lanka semdangba mapang nung ni St Anthony Church semdang, aser iba mapang nung kiralongra ajanga tesem mashie ka nung tai maket nisungtem tepsetba kuli jangja,” ta ashi.
SCO senden nung Pakistan Ato kilonser, Imran Khan-a lia Modi-i, kiralongra tebilemtsü anema raratsü asoshi alima linüktemi tangatetba ulushir longjemtsüla, ta ashi.
Modi-isa SCO züngsem linüktem dang kiralongra anema SCO Regional Anti-Terrorist Structure (RATS) kübok amalitepa inyaktsü ayongzük.
Pai SCO linüktem nungi lenirtem dang kiralongra anema alima sabang nung senden ka ayongzüktsü mepishi.
SCO nung security alitsü atema Afghanistan nung yimjung alitsü, longjema alitsü aser azükaru alitsüji kanga tongtibang, ta Modi-i ashi.
SCO nung India-a züngsem linük ka kümer küm ana jungogo, aser iba mapang nung SCO maparen ajak nung India-ia akokba tashi inyaka aruogo, ta pai ashi.
SCO senden nung adentsü atema Brihostibarnü Modi, Bishkek yimti tonga aru.
SCO ya China leniba nung züngsem linük 8 indang rongsenkettsüng aser security bloc ka lir aser 2017 küm India o Pakistan nata iba telok nung züngsem aküm.
Tesüiba mapangtem nung India linük nung kiralongraba atema India-i Pakistan nem tai tonglokja arur aser Pakistan dang par linük nungi aliba kiralongrar teloktem pusemba anentsüla, ta shia arur.
2016 küm January ita nung Pakistan nung amenoka aliba kiralongrar telok kati Pathankot nung aliba Air Force base amakba sülen nungi India-i Pakistan den ken o jembitsü memelunger.
Taküm küm tetenzüklen Pakistan nung amenoka aliba Jaish-e-Muhammed (JeM) teloki Kashmir kübok Pulwama district nung CRPF sepai 40 tepsetba sülen linük ana tsükchitep jenjang ano tamajungba aküm.
Ano külen tanga osang ka nung, tanep SCO senden tenzüktsü lia Ato kilonser, Narendra Modi-i Kyrgyzstan Tir, Sooronbay Jeenbekov ajuruogo. Jeenbekov ya SCO Summit 2019 nung Chairman lir.
Ato kilonser, Modi Ala Archa Presidential Palace tonga arudang Kyrgyz Tiri pa agizüka liasü.
External Affairs Ministry otongdar, Raveesh Kumar-i twitter ajanga, “Tanep SCO Council of Heads of State senden amentsü jelia #Kyrgyz Republic Tir aser #SCOSummit2019 Chair, Sooronbay Jeenbekov-i PM @narendramodi, Ala Archa Presidential Palace nung pelaa agizük,” ta metetdaktsü.
Taküm Lok Sabha election nung BJP-i takok tulu ngua tanaben sorkar akümba sülen tang mezüng Modi o Sooronbay Jeenbekov na ajuruteper.
Ato kilonser, Modi-i SCO senden mapang China Tir, Xi Jinping, Afghanistan Tir, Ashraf Ghani aser Russia Tir, Vladimir Putin nunger den jurila senden mena linük tsüngda tesendaktep atema jembiogo, ajisüaka Modi-i Pakistan Ato kilonser, Imran Khan bo majuru.