Mumbai nungi tesayurtemi Nagaland semdang

Dimapur District kübok Gamadi Vidyabharati Dhansiripar kaketshirtem den S.C.D. Barfivala High School, Mumbai tesayurtem külemi tangokba noksa ka yangi angur. 

Dimapur, Aami/June 14, 2019 (TYO): Nagaland Angh, PB Acharya-i tenzüktsüba “Teachers Exchange Programme” sentong kübok June 4 nungi tenzüka June 7, 2019 nü tashi S.C.D. Barfivala High School, Andheri , Mumbai nungi tesayurtemi Dimapur aser Kohima Disrtict kübok school balala semdanga liasü.
Iba sentong ayongzükba ya Nagaland nung education system indang maparen aser yimatem angazüktsü nükjidong nung liasü.
Kija aser iba denji külemi lokti ka shisatsü aser temetetba nung renloka aotsü asoshi shisaliok (education) yagi tongtibang shilem ka agir.
Temang anema alitsü atema chiyongtsütem tongtibang shilem ka ama taküm nung takok ngua pela alitsü asoshi tim shisaliok angazüktsüji kanga tongtibang lir.
Shisaliok akaba ajanga, temang, shisatsü aser lokti nung libalirotsü asoshi ajungkettsür. Iba denji külemi, shisaliok ajanga wadang aser lenla balala nung tangazükba angur, koba ajanga pa/la ji temetetba aser tangazükba nung rajema alir.
Dimapur aser Kohima nung school balala semdangba mapang, Mumbai nungi tesayurtemi kaketshirtem rongnung academics tsütsü takok angutsü tejangra aliba aser saisapong balala nung shilem agia tajung kümnüba shisatsütem ajitetta liasü.
Mumbai nungi tesayurtemi ashiba agi, shisaliok ya meimchir ajaki angazüktsü asoshi temetem lir aser ibaji ajanga nisunger shisatsü aser lokti nung taginüba temelenshitem bener arutsür aser ajungkettsür.
Nagaland nung school tem ano tanaben semdangtsü asoshi parnoki tejangraba lemsatepa liasü. Ajiasünungang, State nung shisaliok wadang tsütsü tanurtem atema mapren tajung kar inyaktsütsü.