Kohima nung World Blood Donor Day among

Kohima, June 14 (TYO): Linük tesem ajunga den liromedema June 14, 2019 nü Mount Olive College, Kohima nung “Safe Blood for All” omen nung ajemdaker World Blood Donor Day mongogo, ta ketdangsertem osang ka ajanga metetdaktsü.
Iba sentong ya Naga Hospital Authority Kohima (NHAK)-i Red Ribbon Club aser Mount Olive College, Kohima na den senteper ayongzükba liasü.
‘Azü tenlatsü koda tongtibang’ onük jembidang Medical Officer Blood Bank, Dr. Avila Sangtam-i, shiranger ka nem azü tenla agütsübaji lenla ka nungi dangbo mereprangtsüla saka azü tenla agütsür jenjang-a meteta alitsüji kanga tongtibang, ta ashi.
Laisa azü tenlatettsü aser metenlatettsü atema telemsa asem lir, aser itemji mezüngbuba nung Temporary deferral- mapang tatakzük ka atema azü tenlar kati azü metenlatettsü, tatishitsü agi- tetsür ita shilem aoba mapang, mama yongdaktsüba mapang, mozü tagidak mapang, T.B , Typhoid tashidak lira. Tanabuba nung Permanent deferral- azü tenlar kati akümli piyong azü metenlatettsü, tatishitsü agi- pa/la dak cancer, AIDs, temelungjang tashidak, diabetes, mental aser hepatitis-B lira akümli piyong azü metenlatettsü. Tasembuba nung Self deferral- tensa kar nung azü tenlar kati azü metenlatettsü, tatishitsü agi- azü tenlari shirangba metetra mesüra mapang atsülangra.
Laisa, azü tenla agütsütsü atema India nung tashidak pongubosa tendangtsüla, aser itemji- HIV 1 & 2, Hepatitis -B, Hepatitis-C, Syphillis aser Malaria tashidaktem lir, ta metetdaktsü. Laisa, item ama tashidak alir kati azü tenla magütsütsüla, kechiyong iba azüji shiranger kati agitsü, anungji azü tenla magütsüdangyongi ajakji tama asadangtsüla, ta ashi.
Avila-i, azü tenla agütsütsü atema nisungbaji arishi küm 18-60 tsüngda asütsüla, temang touzük seret 45 mesüra iba dang nungi timba asütsüla, pulse ji minute shia 60 nungi 100 beats asütsüla, Haemoglobin tajemba agia 12.5gm/dl asütsüla, ta metetdaktsü.
Kasa sentong nung jembidang Teacher in-charge, Baptist High, Seketouzo Haralu-i, azü tenla agütsüba aser nisung kar taküm kümzükba ajanga azü tenlari tepela angur, ta ashi.
Paisa, nisung kar nem azü tenla agütsübaji Tsüngrem nem ter-shilem agütsüba den kasa, anungji lanurtem aser temang touzük seret 45 dak temapurtemi azü tenlaba ajanga taküm alangzüktsüla aser temoatsü agitsüla, ta ayongzük.
“Asen azü nung iron tali aliba ajanga tashidak balala adokdaktsütsüa akok, aser azü tenla agütsüshia azüji tanaben züiner,” ta pai ashi.
Seketouzo-i azü 30 ben dak tali tenla agütsüba atema sentong tetenzüklen NHAK-i pa nem nüngo ka sempet agüja liasü.
Iba sentong ya Ajanbeni Ovung leniba nung agi, Chaplain, MOCK, Khekali Aye-i sarasadem, Principal, MOCK, Dr. N. Tiwary-i lokti pelaa agizükba o jembi, Jatphoa Konyak-i ken ka aten aser , Dr. Avila Sangtam-i tepela anküp o jembia liasü.
Iba anogomong nung tesayurtem, VBDAK züngsemtem aser kaketshir 28-i azü tenla agütsüogo.