Oshi aika ashitsü nüngdaker

Tanü putu nung alirtembo alima ajak ya pei lima amato kümer aliba lima ka kümogo. Anepdang yakta saker yimti ta masü saka linük (country) ka nung süngo ajemtsü aser anüngdang chiyongbo tanga linük ka nung chiyongtsü aser iba aonungbo tanga linük ka nung mejangtsü ta asüba lima ka nung asenok alir. Anungji, tanü lanurtem asoshibo pei tetsü oshi den alima ajunga nung nisungtemi sapua jembiba oshi anasemkabosa kanga junga ashitsü nüngdaker. Asenok Nagaland nung alir Naga nunger aser Aor, anungji tamasa asen sobaliba ayak jangjatsü atema pei tetsü oshi jembitettsüla aser zülutettsüla. Iba jagi dang asenok tsüraburtem den tesendaktep tajung lia, parnok nungi kechisarina angazüktettsü. Iba denji ano pei tetsü oshi ashiba ajanga pei nübortem nem tangatetba shisatsü aser lenisüba agütsütettsü. Tanabuba nung, asenok India kübok alir, anungji India nunger oshi Hindi-a kanga junga ashitsüla. Atangji, Nagaland nung ali tashibo pei tetsü oshi den Nagamese shira tangar den nüngdak jembiteta angateptettettsü. Ajisüaka, Nagaland süngküm (gate) adena orrbo tangari Nagamese mangatettsü, anungji Hindi agidang jembitsüsa akümtsü. Atangji, Assam tashi nung Nagamese terara jembia nüngdak inyakteta senzütettsüa akok, saka Assam ajangerbo joko asenok India nungertemi jembiba oshi jembitsü nüngdaktsü. Talisa, yimti balala nung kaketshirtem tazüngdak bushia senzüdang mesüra Delhi amala nung pei jurila nüngdak dang masü saka yimten aser lokti nüngdak inyaka jajadang Hindi mejembitetra action agidang jembitsüsa adoktsü. Atangji, English yabo alima ajunga nung ajaki sapua jembiba oshi ka asünungji, English oshi jembitettertem atemabo Hindi mashiyonga India tesem aika nung angatettepa jembia otettsü. Ajisüaka, asenoki asen sobaliba meraketdaktsünüba amato tangar daka kasa shisatsü alinungji, India tesem aika nung tsümartemi English shia liaka Hindi agidang jembidi asütsü. Ano, Delhi nung balaka office balala nung nüngdak inyaka senzüdang shia liaka English mejembili asür, anungji junga mashiyonga Hindi jembitsüsa adoker. Ibayongji, asenok asoshi pei tetsü oshi den Hindi o English nabo pei tetsü oshi amato jembitettsüla aser zülutettsüla. Tangar bendanger oshi ka ashibaji pei taküm asoshi rongsen aser tashi angulen lir. O agidang kechisarina jembia aotsü aser lemtettsü, anungji oshi junga ashibaji taküm junga lia aotsü tetenzükdak lir. Atangji, ajak atema tongtibang süaka, India ama kin tapu aika meyoktepa alidak, kin shia oshi tapu balala jembiba lima ka nung center government-i school nung Hindi oshi ya kangtepa agitsü asoshi ozüng agütsütsü makok. Iba jagiang,nübortem asoshi inyakba maparen aika rongnung kaketshisatsü yabo state-i mulungba sayutsü asoshi linük temzüngi state nem tashi agüja lir. Asenok yabo yutsür, India anülulentiptsütsü aliba state aika nung Hindi mejembir. Parnoki linük naklu kena junga metentetter. Iba jagi tang linük nung Education Policy tasenba nung school ajak nung Hindi kangtepa agidaktsütsü ta shidanga aliba onük ka anema tesem aika nung nübortemi ola adokogo. Iba jagiang ano linük asoshi Education Policy-ji tajungba küma yanglushitsü imlar. India-bo India saka alinük ulura aser nütsüng aser oshi inra, anungji maparen kasa nung süaka ajak atema ozüng ka asütsübaji tasak akümer. Aji oda, India ajunga nung oshi ka kangtepa angazüktsü, tamangba yimsü ka asütsü, kibalembuba sobaliba ka dang asütsü tabo mesütettsü. Ajisüaka, India kübok ali tashi Hindi oshi ashitsüba yabo tanü lanurtem ajak atema kanga tenüngdaktsü amai reprangtetba agi, taoba hopta nung asenoki iba osang kaket nung “Nagaland nung Primary School nungi tenzüka Hindi oshi ya kangtepa agidaktsü nunga koma süla ?” ta asüba onük nung bilemdangogo. Atangji, tanü asüngbo tanurtemi schooli maodangyongi television ajanga Hindi aser English oshibo shia adoker, anungji asenok mapaji tetsü oshi shidaktsütsü asoshi asenoki parnok den asen tetsü oshi jembitsü kanga tongtibang kümogo. Aji oda, ozüng agi masü saka nüngdaker asünungji, school nung tetenzükdang nungi pei tetsü oshi den Hindi aser English sayutsüsa sentong renemtsü tensa agi akanger.