Dimapur District Disaster Management Authority senden amen

Dimapur, June 18 (TYO): District Disaster Management Authority (DDMA) Dimapur 2nd quarter senden June 18, 2019 nü DC conference Hall, Dimapur nung menogo, ta ketdangsertem osang ka ajanga metetdaktsü.
Dimapur DC aser Chairman DDMA, Keveka Kevin Zehol leniba nung amenba senden nung Dimapur district nung tzüngluruwa mongpu atema renema aliba jenjang asadang aser mock drill agitsü aliba atema o lemtepa liasü.
Dimapur DC-i line departments dang nüburtem tenzüktsü atema renema alitsüla, kechiyong memeteti ajungbena lendong balala ataloker, ta ashi.
Mezüng agiba Mock drill melung mesüi liasü, ta shia pai line department ajak dang rongdak lendong balala atema junga renema alitsü metetdaktsü.
Senden nung District Disaster Management officer Dimapur, Rendemo Lotha-i, Arunachal nungi National Disaster Response Force indang 12 battalion kübok 1 Company tang Central Training Institute nung lir, aser kobi melii parnoki ayong nung lendong atalokba indang mock drill agitsü, ta metetdaktsü.
Senden nungsa power department audit agitsüla, kechiyong lendong mapang nung power department ya kanga tongtibang; taküm kümzüktsü atema mezüngbubaji power line ‘disconnect’ asütsüla, ta bangjem.
Züngsemtemisa office, colleges, schools, business establishments aser cinema hall nung fire extinguishers inoka iba amshiyimji sayutsüla ta bangjem.
Fire & emergency service nungi ketdangsertemi, metre 15 aser iba dang nungi talangba yanglua aliba kitem nung lenmang ana (abelen aser ajichi) alitsüla aser rongdak mapang ki toktsütsü atema emergency exit ka alitsüla, ta ashi.
Senden nungsa Dimapur district nung hydrolic apu ka nüngdakba atema jembi.