Tatsük agi Bihar nung nisung 139 süogo

New Delhi/Patna, June 19 (Agencies): Tawa Bihar state nung tesem aika kanga tatsük küma Bodhbarnü tashi nung state nung nisung 139 tashi süogo.
Anüngdang tali atsükba agi state sorkari June 22, 2019 anogo tashi school aser collge ajak shibangtsü tuyua lir.
Tang tashi nung Aurangabad nung nisung 60 süogo, Gaya nung 41, Nalanda nung 14, Nawada nung 12, Munger nung pongu, Kaimur aser Vaishali nung anana aser Ara, Khagariya aser Samastipur district shia nisung kaka süogo.
Ano state nung tongtibang yimtitem- Patna, Gaya aser Bhagalpur nunga taoba hopta ana tashi kanga tatsük liasü. Patna Meteorological Centre ajanga ashiba agi, Hombarnü Patna, Gaya aser Bhagalpur nung kanga tatsük liasü.
Hombarnü Gaya nung District Magistrate, Abhishek Singh-i anüngdang tali atsükba agi nisungtem kimai maludaktsütsü atema district nung curfew ozüng benoka liasü.
DM office ajanga nisungtem dang anüngdang 11:00 ako nungi nikongdang 4:00 ako tashi ki telung nung ang alitsü tuyu.
Ano district administration-ia anüngdang 11:00 ako nungi nikongdang 4:00 ako tashi kisüjensü mapa kecha meinyaktsü tuyu.
MNREGA programmes kübok anepdang 10:30 ako nungibo mapa meinyaktsüla aser kasa mapang nung moapu nung senden mamentsüla, ta administration-isa tuyu.
Bihar dang masü North tsütsü aliba state aika kanga tsüka kümogo. Rajasthan aser Madhya Pradesh na nungbo anogoshia temperature 46 degrees Celsius dak tema atur.
Tesüiba anogo asemnü tashi Patna aser Gaya na nung temperature 42.4 degrees Celsius tashi tuogo, ta tanü Patna Meteorological Centre osang ajanga metetdaktsü.