Straightway Hr. Sec. School pur Annual Summer Camp akar

Mokokchung, June 19 (TYO): Straightway Higher Secondary School, Mokokchung pur 10th Annual Summer Camp sentong ka “Get Up and Move On” omen nung ajemdaker parnok school campus nung kadar.
Iba camp ya phase ana küma lemsar agir. Mezüngbuba nung Montessori nungi class 10 tashi pur atema June 19 aser 20 nü akatsü aser iba sentong nung shisalen sayurtemji; Lima Imsong Missionary (Dimapur); Arong, Missionary Teacher; Lamdok, Missionary Teacher; Akumnaro, Missionary Teacher; Anungla, SCC&H parnok lir. Kaketshirtem nem Tsüngrem o den külemi tsüngibangiba maparen balala ajanga tanela chiyungtsü balala anganüa agütsür, ta osang ajanga metetdaktsü.
Tanabuba phase-ji Higher Secondary kaketshir atema 21st June nungi 23rd tashi Mongoya Prayer Centre, Chuchuyimpang nung ayonga akatsü. Iba nung shisalen sayurtemji; Lanu Imchen, Asst. Teacher, Impur; Dr. Aotemshi, Chairman and Founder SMC; Awala Imchen, CCPRA, CTC parnok asütsü.
Iba summer camp ya kaketshirtem nem Tsüngrem o ajanga tanela chiyungtsü agütsütsü aser temenen lenmang nungi pilar pei taküm tazüokba nung Tsüngrem den jajatsü nükjidong yur ayonger, ta osang ajangasa shisem.