Impur nung ABAM Pastoral leadership training takok ngua kaogo

Impur, June 19 (TYO): June 17 nungi tenzüka anogo asemnü tashi Impur Mission Compound nung ABAM kübok aliba Arogo balala nungi pastor-tem asoshi ‘Pastoral Leadership Training’ sentong ka kaogo. Iba sentong ya Ao Baptist Arogo Mungdang aser Northeast Alliance for Leadership Education and Social transformation (NEALEAST) telok na külem sür “leaders as agents of holistic transformation in Northeast India” omen nung ajemdaker ayongzük.
Iba sentong nung tongti shisalen sayurtemji; National Centre for Urban Transformation (Bangalore) Director, Dr. Atul Aghamkar, taoba DABA Pastor Rev. Maong Lemtur, taoba Phom Baptist Churches Association (PBCA) executive secretary, Nuklu Phom aser NEALEAST Founder-President, Rev. Dr. Tekatemjen parnok liasü. Iba den ano ABAM executive secretary Rev. Dr. Mar Atsongchangeria sentong nung shilem agia liasü.
Iba training nung Christian ministry atema tajaba, pastor ka teinyaktsü, Christian lenisüba aser tanela asentenshi, Arogo ka mission, pastor yimsüsüba, tenyar Paul-i sayuba lenisüba aser pa mapatem, Arogo ka mission mapa nung amdaktsü lenmangtem, Christian lenisüba tongtibangtem, Christian lenisüba aser loktiliba temelenshi, pastor ka kibok kisem aser evangelism mapa item onük balala nung ajemdaker shisalen sayurtemi tensa den apet teinyaktsü aika bener arua lemsatep.
Iba sentong nung jangratemtsü kaji; ‘Christian lenir kibong (the Christian leader’s family)’ onük nung ajemdaker panel discussion ka agia liasü. Iba panel nung Anungba Imsong, Toshi Sanglir, Alemla Mozür, Temsüwati Kichu aser Nuklu Phom parnoki shilem agi. Iba training nung pastor noklang ka dak tema arua shilem agia aden.
Nagaland nung NEALEAST-i leadership training ayongba yabo ibai mezüngbuba asütsü aser iba training ya zünga Northeast nung leadership training pungbuba ayonga akar. NEALEAST-i ayongba leadership training nung nisung teimtiba adenbaji ibai lir, “pastor-tem paika arutsübo kecha imlaa maliasü aser shilem agirtemi jangrabangra yimya awashi tajung nung angazükba ngua kanga pelar”, ta NEALEAST Founder-President Rev. Dr. Tekai osangbenertem den jembidang ashi. “Iba training ajanga tajangzük tulu angutsü imlar”, ta paisa shisem.
‘Arok ajangzüktsü atema inyakba lenisüba nung asenok kanga ajema lir, tamajung bilemba nungi tajungren bilemba mulungsentsü agi melentsüla, temelenshi bener arubaji agizüktettsüla aser iba asoshi tasü aittsüla’, ta ABAM executive secretary, Rev. Dr. Mari ashi. ‘Ao lima Christian yimsü arur joko küm 150 jungdi ta asüba mapang ka lenisüba nung tashi itdaktsütsü mapang tetemsü ka nung iba sentong ya ayongogo’, ta paisa pelaba olen ka lemsatep.
‘Christian lenisüba aser arogo yimsüsüba indang kangabo mejangjai aliba mapang ka, iba training nung shisalen sayur balalai itemji rajema angatetdaktsüba den külemi pastor ka teinyaktsü aika shia tajangzük tulu nguogo’, ta yangji adener pastor kadi iba osangbener den jembidang pa temoatsü anguba kar lemsatep.
‘Tajangzük aika rongnung Pastor kati tensa mapang den apet inyakba den külemi tarutsü nung santemji koleni anitsü ta mangdang tejangja yur aotsü angazükba asoshi kanga pelar’, ta pastor katisa ashi.
NEALEAST ya 2015 küm tenzük aser iba telok ya tongtibangsa Northeast Region nung lenisüba tsütsü sensaka aliba ngua iba tebilemtsüji ajemdaktsütsü nükjidong yur tentet. Region nung aliba lenirtem nem tensa den apet sentong balala ayonga temelenshi adokdaktsütsü aser iba ajanga temeyoktep sobaliba aser loktiliba nung tebilemtsü ajurubatem langzütsü renemshidaktsür. NEALEAST yagi arogo dak nükmen yur lenisüba luyim dak sentakba nung maparen balala inyaker.