“Linük ka, Election ka” atema luden ka tentettsü

New Delhi, June 19 (Agencies): India nung elections ajak mapang ka nung agitsü asameyangtsü atema Prime Minister Narendra Modi-i luden ka tentettsü.
‘Linük ka, election ka’ senden amenba sülen Defence Minister Rajnath Singh-i iba osang metetdaktsü.
PM Modi-i ayongba party ajak senden nung political party teimba kati iba tebilemba molunga agizükogo saka party kari iba sentong magizüker, ta Rajnath Singh-isa ashi.
“CPI, CPM teloktemi iba mapa inyaktsüba nung tetsükdaktsü ajurutsü ta ashi saka parnoki tebilemba anenabo menokdak” ta paisa shisem.
“PM Modi-i luden ka tentettsü. Iba luden nung political party ajak nungi nübotem adentsü pai telemtetba agitsü” ta Rajnath-isa ashi.
Tanü amenba senden nung Trinamool Congress tanishir Mamata Banerjee aser Congress tanishir Rahul Gandhi naprong maden. Ajisüaka, Political party 21 nungi tanishirtem aden.
Sorkari political party 40 nungi president tem jaok. Party asemi president masü saka teshimtet nübotem yok. AIADMK-ibo shinga meyok, saka shidi ka ajanga parnoki molunga lir ta zülu, ta Rajnath-isa metetdaktsü.
Tanü senden metenzükdang Odisha chief minister Naveen Patnaik aser Andhra Pradesh chief minister YS Jaganmohan Reddy naprongi ‘elections külemi agiba ajanga senotsü aika kümzüktsü’ ta ashi.
Communist Party of India (Marxist) general secretary Sitaram Yechury ya PM Modi’er ‘one nation, one election’ sentong anemer ka lir aser pai iba sentong magizüker ta ashi. CPI tanishir D Raja-ia kasa olenji ashi.
Külen, Arvind Kejriwal’er AAP-i ashiba agi “meraksa sernung yanglutsü merangba inyakyim ka lir.”
Tanü amenba senden nungsa BSP tanishir Mayawati, SP tanishir Akhilesh Yadav aser DMK tanishir MK Stalin nungertem maden.
Telangana chief minister K Chandrashekar Rao, TDP tanishir N Chandrababu Naidu aser AAP tanishir Arvind Kejriwal nungertemia senden nung maden saka parnok melena teshimtet nübo ka ka yok.