Guwahati nung ‘pangolin’ ka ayoktsü lia kümzük

Guwahati, June 21 (Agencies): Wildlife Crime Control Bureau (WCCB) aser Assam forest department ketdangsertemi pangolin shiruru ka kümzükogo.
Nisung anati iba shiuru ya Nagaland nung alir ka dang yokdoktsü atema lia police-i tena apu.
Wildlife Protection Act, 1972 nung arrla balala kübok tena dak tai tonglokja apu.
Brihostibar aonung Guwahati nung nisung anaji hotel ka nung apu aser tena ket nungi pangolin ji kümzük, ta WCCB ketdangser kati ashi.
Iba shiruru alizüktsü aliba nisungji jena oadok, ta paisa ashi.
“Tenaji Meghalaya nungi Micheal Palmar aser Arunachal Pradesh nungi Biri Hachi na ta jangjaogo. Tenati shiruruji Naharlagun nungi bener aru aser Nagaland nung nisung ka dang ayoktsüba liasü” ta ketdangser kati ashi.
“Southeast Asia linük ka nung pangolin indang teküp ya kanga bushiteper kechiyong iba ajanga tashidak aika aneper” ta ketdangserisa shisem.
Northeast India kübok state tem nung pangolin tapu ana angur- Chinese pangolin aser Indian pangolin.
IUCN red list nung iba shiruru tapu anaprong ya ‘threatened species’ ta züngoka lir.