Bihar nung AES agi asür 158 jungogo

New Delhi, June 21 (Agencies): Bihar nung Acute Encephalitis Syndrome (AES) agi tang tashi nung tanur 158 süogo; tan ita tetenzüklen state nung iba wara poktetba sülen tanur timtiba asüba district ji Muzaffarpur (tanur 122) lir.
Ano Vaishali nung tanur 17, Begusarai district nung trok, Samastipur nung pongu, Motihari nung ana, Patna nung ana, Bettiah nung ana aser Bhagalpur o Gopalganj na nung tanur kaka süogo.
Centre aser state sorkar napronglai iba ya süoki ia agia taoba Amongnü Union Health Minister, Harshvardhan-i Muzaffarpur semdang, iba sülen anogo ana lir Chief Minister, Nitish Kumar-i district sema senzüba den ketdangsertem senden ka ayongzüka senden menogo.
State health department-i tanga district tem nung aliba additional medical officers, child specialists aser nurse tem Muzaffarpur-i yokogo.
Oral rehydration solution (ORS) angati alemtsü atema Health Workers nem agütsüogo, iba denji külemi state sorkaria iba tashidak agi shirangertem nija hospital aser nursing homes nung sen indokba aser ambulance hire asüba sen sorkari agütsütsü, ta sangdong.
Ano sorkar hospital den tesendaktep kecha maliba child specialists aikati tanurtem atema angati health camps katsüdar.
Tsürabur kati, “Tesüiba anogo 4-5 ozü tanurtem temang metaa shiranger. Doctor-i mozü chidaktsütsü metetdaktsü, iba sülen-a maneni temang metara mozükidangi anir aotsü tuyu. Onok ket nung sen mali. Shingai onok dang kecha mashir mesüra ORS magütsür,” ta ashi.
Osang angazükba agi, kibong nung züngsem 5-7 alirtem nem ORS anana agütsür, ajisüaka kibong karbo ka danga mangu.
Chief Minister Kumar-i AES agi asür tanurtem kibong shia nem teyari sen lakh 4 agütsütsü sangdongogo. Paisa Health department, district administration aser doctor tem dang iba tashidak anema raratsü tuyuogo.