NDA sorkari Lok Sabha nung Triple talaq bill benok

New Delhi, June 21 (Agencies): Hokolbarnü Ato kilonser, Narendra Modi-i aniba NDA sorkari Lok Sabha nung triple talaq bill tanaben benoka liasü; Modi-i aniba kümsük tanabuba sorkar mezüngbuba Parliament nung Muslim Women (Protection of Rights on Marriage) Bill 2019 ya tama benokogo.
Sorkari, iba bill ya Muslim tsürtem nem temeden agütsütsü atema lir, ta ashir, ajisüaka opposition party temibo, iba bill ya linük temzüng alema lir, ta shia iba bill anema nokdaker.
Parliament nung opposition party temi iba bill anema ola adokaka tanü Union Law Minister, Ravi Shankar Prasad-i iba bill benok. Prasad-i, linük nung triple talaq ken o 543 lir; Supreme Court-i iba ya nokdangaka triple talaq tatalokba 200 liasü, ta metetdaktsü.
Prasad-i, “Iba ya tetsürtem akhümket atema lir aser ibaji kümzüktsü atema onoki inyaktsü,” ta ashi.
“Muslim tsürtem temeden kümzüka ayutsü. Iba ya tetsürtem temeden aser tetsürtem nem tashi agütsüba onük ka lir. Ozüng yanglutsü atema nüburtemi asenok shimogo. Ozüng yanglutsüji asenok teinyaktsü mapa. Iba ozüng ya triple talaq ajanga takoksa angurtem nem temeden agütsütsü asoshi lir,” ta Law Minister-isa metetdaktsü.
Minister-i iba bill benokba sülen Congress MP, Shashi Tharoor-i iba bill ashishia, “Sürabangla pei kinüngtsü toktsür ajak nem temerenshi agütsütsü atema sorkari ozüng ka yanglutsüla,” ta ashi.
Congress lenirisa, “Pei kinüngtsü toktsür aser ozüng alema inyaker ajak asoshi ozüng ka yangluang. Kechiba tamangba yimsü ka (Muslim) nung dang rangloker inyaker, kechiyong Supreme Court-i iba Act ya ozüng alema lir ta oshidang agütsüogo. Iba ya ajanga Muslim tsürtem kümzüktsü melen parnok timtemi yoker. Iba bill ya tim masübayim nung amshitsüsa lir,” ta ashi.
Ano All India Majlis-e-Ittehad-ul-Muslimeen (AIMIM) tongti, Asaduddin Owaisi-ia iba bill anema ola adok. Sorkar aija Owaisi-i, “BJP-i Muslim tsürtem atema kanga bilemtsür, ajisüaka Kerala nung Hindu tsürtem Sabarimala tekülem ki telungi atutsü temeden anemabo nokdaker,” ta ashi.
Owaisi-i, “Triple talaq bill ajanga linük temzüng alema inyaker, kechiyong aibelener Muslim nunger küm asem tepoukdak ayutsü, ajisüaka kasa aibelen atema Muslim nunger masüba teburtembo küm ka dang tepoukdak ayutsü,” ta ashi.
Lok Sabha Speaker, Om Birla-i Prasad dang iba bill benoktsü asüngdangba sülen opposition züngsem aika ola adoka iba bill anema nokdak, iba sülen Birla-i opposition dang parnok tebilemba lemsateptsü temelaba agütsü.