Temelenshi ka

Alima nung temelenshi ya teimbaka asenok merenemi alidang arur, anungji aikati temelenshi ya jet tabo magizüktetter aser timtema ajurur. Item temelenshi rongnung ka tang asenoki ajurubaji government-i plastic mamshitsü ozüng agütsüba ya asütsü. Atangji, plastic mamshitsü ta ozüng agütsübaji plastic agi yangluba oset kecha mamshitsü ta masü saka khen dang amshir endoktsüba oset kechisa plastic agi yanglur, itemjiang nokdanger. Khen dang amshirbo endoktsüba plastic osettemji plastic agi yangluba auso, marok, spoon aser yangku, luli amala osettem asütsü. Plastic ta asüba nungji nylon aser thermocol agi yangluba osettema dena lir. Item plastic agi yangluba osettemji taküm küm September 18 nungibo kenyongi mamshidaktsütsü. Joko, plastic agi khen amshir endoktsüba osetttemji ozüngi memelaba oset akümer asünungji, dokan nung dang masü saka kaketreju aser lokti sendendak itemji amshira senchi achitsü. Plastic ta asüba nungji tzü tajemtsü bottle dena lir, anungji item ajakji tang nungi ita asem tsüngda shibangyonga aotsü.  Joko, tesem kar nungbo yimteni peisasa mulungtetter iba ozüng ya mapa küma inyak tenzükogo. Item tesemtem nungjibo shishilembadak polythene yangku mangur asünungji akhidang amato osangkakettem tejen agi dang aleper agütsür. Idangji karibo mepelar, kechiyong polythene yangku nung tayi dener yangji seper ayongayonga merükmerüka bener aotsüsa agütsüba melena kaket nung asenok teka ajak menena bener aotsüsa agütsür, itemji benshitsü mapa tasak lir. Ano, asenok timtem ajurutsüba kaji lokti senden aser benjongbentsü nung nisung aika asüyonga kecha timtem mali tzü bottle nung lema agütsüba to tzü bottle to mamshidaktsütsü, anungji tzü pongdang tulu nung bener arua paper agi yangluba mesüra glass marok nung dang züzüka ajemtsüsa adoktsü. Joko, kiyimba benjong nunga plastic mesüra thermocol agi yangluba auso marok aser spoon mamshitsü. Tang yongi item plastic aser thermocol agi yangluba auso aser marok amshitsübaji taaktsüka kümogo. Atangji, iba temelenshi ya meimlaika ajungbena arur masü saka alima tzü mopong mejungi akümtsüba lendong nungi kümzüktsü asoshi joko mapang talangka nungi jembia arur. Iba kasa tekümdangtsü osang ya government-ia jelia metetdaktsüogo. Ibayongji, government-i anepalua tesem ajaklen nisungtem dang kaket agi yangku yanglutsü sayuba sentong ayongzüka agiba angashir. Iba ama temelenshi aruba ya nübortem takoksa ngudaktsütsü atema oa aliba lenmang ka shibangtsür masü saka tang oa aliba lenmang toktsür ano tanga lenmang tajungbalen kati aotsü lenmang lapoktsür. Aji oda, plastic bottle nung tzü yoka aliba ya plastic bottle melen ano kaket mesüra aou süngküm agi yangluba pongdang nung ayoktsü. Iba amaji kaket agi aser süngo tu tapu balala agi auso marok yanglutsü. Ano tang plastic agi yangluba spoon amshia aliba melena süngküm, aou aser süng agi yangluba spoon amshitsü. Itemji asenoki yanglutettsü. Kodang asenoki temelenshi aruba ya tajunglen agi bilemdanga agizükdir, temelenshi aruba nungji mapa tasen aika asenok nem bener arutsür. Anungji, asenoki mapatemji inyak angazüktsüla. Alima nung pei nüngdak dang masü saka tangar nüngdaka dena agütsüteta jangratema alirtemji temelenshii bener arutsüba nüngdak ataloktsürtemji lir. Asenokbo tia ajung, asenok ajak ya ali kiburtem lir aser asenok meyong aremtem nung meyiba süng, aou, süngküm aser süngolio agi tanü asenoki amshiba plastic osettem melena ya aika yanglutettsü. Itemji lanurtemi bilemdangtsüla. Atangji, asen lima nungbo plastic melen am agi mesüra süngo tu mesüra aou süngküm agi auso marok aser spoon yanglutsüsa mangazüktettsüa akok, anungji tangar den asüngdangtepa item angazükdak tesemji bushitsüla. Item mapaji tasak masü, yanglutsüba yimya ka dang angazüker arunung, ano item dang nungi tajungba asenoki apiteta yanglutettsü. Lanurtem kaketreju nung degree tajung ngua azüngtsübaji junger saka degree tajung dang nungibo asenok kolok agi bilemba nüngdak mapa ka teka agi inyakteta rongsen yanglutetbajisa tajungba. Asenokbo degree dang masü rongsen poktetdaktsüba lenmang bushitsüla. Idangjibo asenok ya mapa bushir masü mapa agütsür akümtsü. Temelenshi junga agizüktettertemi dang yamaji litettsü.