Chi, sen aser menden yong meyokli

Senso ka dak pei tetsü tasoli meimba aser pei yimten temeten aser aküm angetetba shisatsü aser tanüla lira, pa mesüra laji shingaia kecha agia alitsü makok. Pa mesüra laji chiyongtsü maka lumiseta aliba mapang ka chiyongtsü agi tendangaka metsüktsü, sensak tia nung senotsü agi mesüshiaka malangtsü aser tepetzük tia nung alidang yimten nung menden tajung agütsütsü ta mesüzükaka memesüzüktettsü. Senso ka dak kodang pei tasolima meimba shisatsü lidir, tsükchiri pa mesüra la temangjibo samatsütsüa akok saka pa tangatetba aser tanülajibo teti taküm alitsü. Aji oda, asenoki aginüba aser bilemba ama tangsa tangbo mataloktsüa akok, saka kodang asenok dak pei nübortem meimba shisatsü aser pei yimten temeten angatetba shisatsü aser tanülaji tashi itta lidir, asenok kodanga tezü matangtsü, tasü mait makümtsü aser chisu ka yong mesüra yimten nung jenjang ka aginübayong asenok mayoktsü. Pei lima aser pei nübortem asoshi yimten tangatetba nung akanga nokdakba jangratemtsüji aji lir. Item amaji asenok tsürabur, chirnur aser adianu aika taküm samaogo saka tasüa mesasa, kechiyong parnok taküm tenla jagi asenok tangar tsüngdang akümketa alir aser tarutsü teimla mesamar. Ajisüaka, tejashitsüka tanü asüng lenir aser yimsüsürtemi itemji kecha masadangi tanü ajunga asaa jembir aser inyaker. Atangji, tanübo asenok linüyonga melinüyonga India temzüng kübok alir, anungji India senso lir. Ibayongjiang, Naga nunger linük nüchiso bushirtema dena India senso ka ama temelaba kaket bener alima kintem sema senzür.  Ajisüaka, asenoki asenoksasa tiaksanga asenok India nunger ta jembira, iba jagi asenoksasa asenok jenjang talangkati luadoker. Asenoki asenok yimten aser loktiliba nung asenok taküm jenjang ya medemdangra, asenoki asenoksasa India senso ta zülur aser jembir dang ashi, kodang asenok Nagaland adena orr Delhi Mumbai nung senzüdir, idakjibo asenoki parnok dang asenok ya India nungera ta ashiyonga parnoki mamanger. Tanü tashi India nung asenok yimten aser loktiliba ayak jenjangji iba tashi nungji lir. Iba amaji India nungasüng asenok senso ayak mejangjatet aliba mapang ka, Nagaland nungbo tsümar agi tasüng aser joko tsümartemi Nagaland nungi ILP ozüng ya agientsüla ta okadak ken o benoker. Külen, Nagaland tatar hoho nungbo Dimapur nung dena ILP amshitsü ta lateta ayu saka lateta ayuba dang ashi, mapa küma aotsüsa kecha meinyaki alidang, tsümar kati Dimapur nung ILP amshitsübajibo yutsür Nagaland nungi ILP ozüng ya agientsüla ta okadak ken o benokbaji asenok ajak asoshi shisabolutsüka kümogo. Center nung tang aliba BJP government yagibo parnoki election mapang nangzükba ama, ashiko, Jammu & Kashmir nungi dena tang temzüng ozüng balaka aliba ya agientsüa akok. Aji oda, Jammu & Kashmir atema temzüng balaka lateta amshia aruba agientet nungbo, Nagaland nungi ILP ozüng agientsübajibo tasak masütsü. Iba atemaji tang Nagaland government aniba NDPP telokia kechi koda bilemer ? BJP den mejungtep nungbo timtem aika ajurutsü alinungji, parnoki kechi shidir hai ta dang anidaktsü asü mesüra masüba aser majungba nungbo nunga ta nokdaktettsü. Andhra Pradesh nung YSR Congress telokibo Lok sabha nung Deputy speaker mendena, parnoki aginüba ama Andhra Pradesh lima ya tangar dang nungi balaka tajungba reprangtsüba state ka ama mezüngokra , magizüktsü aser BJP-i aniba government nunga medeni atatsü ta metetdaktsüogo. Pei lima ajungtsü asoshi yimten nung pei kija jenjang ajungtsü mebushiba aser mebilemba nisungji YSR ya ka lir. Asenoka parnok nungi angazüktsü tuluka lir. Asenok küm paikya yimten temeten bushidang reshikangshi timtem aser takoksa tesama ajuruba indang aria bilemtsü melen, ano tang akaba ILP ozüng dena agientsüla ta jembiba ken o jibo Naga nunger mezüngmeshiba mapa ka lir. Iba jagi tamalen Naga yimten nüchiso atema taküm bendanga agütsürtem taküm tenla ajak amajok kümdaktsür. Asenokbo Naga nunger ta asüba ayak aser tangatetba tanüla nung khen longjemshidi aser senyong mesüra yimten jenjang tajungbaka aginübayong asenok temetenbo meyokli.