Yimkong asoshi

Dimapur nung Ao Kaketshir Telongjem Dimapur tenzüker küm 50 ajungba Golden Jubilee tenüng nung yimkong ajungtsü asoshi mapa tajung kar inyaktsüba rongnung tongtibang tesemtem nung süngdong temtsüba, nübortem pelapelaa jajatsü atema yimkong sidewalk yanglutsüba aser nisungtem anisüngzükdak Jubilee Park nung angati tzü tajemtsü tajung agütsüba mapatemji Jubilee amonga langa inyakogo ta asütsüsa inyakogo. Akhi yimya nungbo Jubilee amongbaji otsü kaket tajung ka adoktsü aser anogo ka agiteta sentep sentong tajung yanglua monger lokti chiyong pelatepa jangratema chiyonger monger senshitsü. Atangji, tanü yamaji amonger aser ajia junger. Ajisüaka, Jubilee amongba tenüng nung ajak ajangzüktsüsa nüngo mapa ka inyaka toktsübajisa tajungba ta bilema kari nüngshilong tajung tulu azünga toktsür aser gari kiojen yanglur. Tajung kaji telok aikati Jubilee amongba tenüng nung Jubilee Memorial building yanglur. Iba jagi jubilee amongba mamar aser Jubilee sülen tajangzüka angur. Ajisüaka, asenoki jungjunga bilemdangra, Jubilee tenüng nung asen agitsü ki ka yangluba mesüra bara ki ka asüba jagi jubilee amongba tetezübo kecha magütsür. Jubilee mamongyonga asen agitsübajibo mashi mapang nung inyaktet. Aji oda, Jubilee mamongyonga nüngdakra aser kokra bara kia yanglutet. Iba tangatetba nung telok ajaki Jubilee among shia yimkong ajangzüktsüsa nüngshi mapa ka inyaka toktsüra, iba jagi alima tuluka renloktsü aser jubilee among metetmeteter asütsü. Talisa, tangar bendangertem den meyoktepa alidak lima Dimapur aser Kohima ama yimtitem nung asenok aliba metetdaktsütsüsa yimkong ajungtsü atema nisung shiai mapa tajung tilala kaka danga inyaka toktsüra, iba jagi memeteti tangari asenok akümtsübutsü aser moatsütsü. Atangji nunga, Aor alidakbo kilong kima ajak merükmerüka ayur, iba kisüng jagia alima topur jungdaktsür aser yangji alirtem yimkong nümadangdaktsür. Iba amaji Aor alidakbo metetmeteter temerük, tesüngjem aser yimkong ajungtsüba sentong tapu balala atonga inyaker ta tangari tatishitsü tajung agia jembitsüsa asenoki inyaktsüla. Asenok ajaki pei kilong aser kimabo kanga topor junga ayur, ajisüaka tang tashi asenok dak tashimait ka reprangtetbaji asenok yimti yimdong topur jungdaktsütsü asoshibo asenok aikati mebilemer. Ano, tang tashi asenok aikati pei kidang okdenba janaona sepa bener oagi tangar kima endoker. Asen alidak yimti yimdong yanglurtemia mashimashi yanglur toktsür. Ajisüaka, asenoki angatettsüba kaji, asen lima topur ajungtsübaji asen talidak kilong aser kima kisüng topur junga ayuba agi ajungtsüba masü saka tangar ralirwalir aser süisüpongertemi anguba yimti yimdong ajungba agidang asen limaji topur ajungtsü. Ibaji bilema, telok ajaki jubilee amongba tenüng nung alima topur ajungtsü asoshi sen endok mesasai mapa tajung kaka danga inyaka toktsüra asen lima ya memeteti junga adoktsü. Government tsütsüa government li ajak nija li mekümdaktsüi kiyong shia tanurtem, tantsür tamburtem aser aiür asangurtem kazüdak moapu tesadem tajung nung park mesemteta toktsüra, iba jagi alima topur ajungtsü aser nübortem anisüngzüktsü. Government-i meyanglutsüyonga kiyongertem longjemer pei kiyong shia nung iba ama yimkong ajungtsü asoshi mapa tajung apiteta inyakra, iba jagi asen limaji süngjemsüngjema topur jungadoktsür. Atangji, Ao Kaketshirtemi Dimapur nung yimkong asoshi mapa tajung inyaktsüba ngur, tangar kin kaketshir telongjem karibo parnoka parnok yari yimkong ajungtsü asoshi mapa inyaka tenzükogo. Iba amaji tang nungibo asenoka jubilee among mamong kecha mali, Dimapur aser Kohima nung aser asen alidak nübortem asoshi langkabo asen sen aser asen nübo agi yanglutsütsü merangdi. Iba amajika asen rongsen aser nübo agi asen alidak yimkong ajungtsü asoshi mapa ka meinyak tashi asen yima dena aseni asen yim ama mebilemtsü, anungji Dimapur ama yimtibo asen lima ser nung bendanger lima ama dang teti bilema alitsü. Joko, asenoka asen alidakbo kibur küma alitsüsa akok tashi asenok longjemer yimkong ajungtsü asoshi maneni mapa tajung inyaktsüla.