Mehul Choksi senso temeden agiener India-i yoktsü: Antigua PM

New Delhi, June 25 (Agencies): Antigua linük Ato kilonser, Gaston Browne-i, Mehul Choksi nem agüja aliba senso temeden agientsü aser India-i meyipa yoktsü, ta metetdaktsüogo.
Choksi ya tang Caribbean linük, Antigua nung lir. India nung sen crore 13000 dak sendakba nung Punjab National Bank ashioktsüba ken o nung Choksi aser par kinünger, Nirav Modi na nem tai tonglokja lir. 2018 küm January ita mezüngbuba hopta nung Choksi-i linük toktsür jena aoba sülen Antigua nung jenok.
Browne-i, Mehul Choksi indang legal maparen ajak tembangba sülen pa India-i meyipa yoktsü, kechiyong Antigua nung aibelenertem mejenokdaktsütsü, ta metetdaktsü.
“Choksi indang senso temeden yanglu saka pa nem agüja aliba senso temedenji agientsü aser India-i meyipa yoktsü. Tang iba ken o ya court nung lir,” ta Antigua Ato kilonserisa metetdaktsü.
“Aibelenertem atema-a fundamental temeden lir, aser Choksi-i court-i oa pa temeden bushitsü pa dak temeden lir, ta onoki India dang shiogo. Ajisüaka pa indang legal maparen ajak tembangba sülen pa meyipa yoktsü,” ta Browne-i ashi.
Mehul Choksi aser par kinünger, Nirav Modi nati bank ketdangser kar den tesendaktep yur ochimashi shiditem ajanga PNB ashioktsü.
PNB indang Mumbai branch kati 2011 küm March ita nungi Modi indang company tem nem LoUs agütsü. Nirav Modi indang company tem nem agütsüba LoUs ajak agi 1,213 lir aser Mehul Choksi den par kinüngertem aser Gitanjali Group nem agütsüba LoUs ji ajak agi 377 lir.