Nashi Chang shibelener tongtiba apu

Guwahati, Aami/June 25 (Agencies): Assam police-i state o state tsüngda nashi chang shibelener rongnung tongtiba Bihar kübok Gopalganj tesem nungi puogo.
Tang police-i pua aliba shibelensang tenüng ya Sarfaraj ta jangjaogo aser pa North East nung state tem nungi international arrtsü ajanga Bangladesh-i nashi chang shibelenba nung densema liasü.
“nashi cahang shibelener ka Bihar police den senteper Assam police crime branch-i meita aoba mapang puogo,” ta police ketdangser kati ashi.
Guwahati police commissioner Deepak Kumar-i ashiba agi, tang pua aliba shibelenertem nungi osang tejangja ka angazükba sülen Sarfaraj aputsü atema meita aoba sentong ya ayongzük aser pa Bihar kübok Gopalganj tesem nungi puogo.
Paisa, meita aoba sentong ya state nung nashi chang shibelenba dak sendaka lir aser tesem balala nungi nisung aika puogo.
June 12 nü Bangladesh den arrtsü nung Guwahati, Dhubri aser South Salmara districts kübok meita aoba sentong balala agiogo aser iba mapang nung nashi chang shibelener parnok 16 pua liasü.
Parnok rongnung kar ket nungbo yinzü agi yangluba atsü mejepdangtsü asoshi amshiba hadir bener lia puogo.
Police temi ashiba agi, parnok item hadirtem ya atsü nung yinzü mejepdanga nashi chang arrtsü adena bener aotsü asoshi amshir.