Rajya Sabha nung Assam MP-i Bodo oshi jembi

Guwahati, June 25 (Agencies): Assam nungi Rajya Sabha MP-i Bodo oshi agi o jembi aser iba ya Parliament nung tang mezüng atema inyakba mapa ka lir.
Rajya Sabha MP aser Bodoland Peoples’ Front lennir Biswajit Daimary-i par tetsü oshi agi jembi.
Rajya Sabha züngsemtemi oshi 22 tashi nung jembitsü akok aser oshitem rongnung Bodo dena lir. Bodo oshi ya Constitution indang 8th Schedule nung dena lir. Yaküm June ita Rajya Sabha Chairman M Venkaiah Naidu-i iba telemtetba agia liasü.
“Bodo ya takar oshi ka lir. Iba oshi nung alima ajunga indang olungtem dena lir aser Bodo oshi ajanga nenoki tebilemba mesüra oset mashii ka ashitsü akok. Ajisüaka, onoki iba oshi balaka raloka moudaktsüteter. Researcher temi Bodo oshi ya kong nungi aser kodang nungi jembitsü tenzük’ar mebushiteter” ta Daimary-i ashi.
Pa ya mezüng 2008 nungi 2014 tashi RS züngsem asütsü shim aser ano tanaben April 2020 tashi inyaktsü shima liasü.
“Bodo oshi ya alima nung oshi tejentiba rongnung ka lir aser Nepal, West Bengal o Bangladesh nung alirtemi kanga jembir” ta Daimary-isa shisem.
Bodo oshi agi jembiba sülen paisa Hindi agia jembi.
Bodo ya Bodoland Autonomous region indang official language lir aser Assam state nung co-official language lir.